हिउँदे अधिवेशनय् नां व राजधानी
प्रदेश ३ या अस्थायी राजधानी व नांयात कयाः अझं विवाद
येँ – वइगु हिउँदे अधिवेशनय् ३ नम्बर प्रदेशया राजधानी व नांया बारे निर्णय जुइफइगु खँ सूत्रं धाःगु दु । वंगु अधिवेशनय् हे राजधानी व प्रदेशया नां क्वःछीमाः धकाः प्रदेशया सांसदतय्सं दबाब बिउगु खःसां नं वंगु अधिवेशनया कार्यसूचीइ धाःसा थुकियात दुमथ्याकूगु खः ।
सूत्रया कथं आः वइगु हिउँदे अधिवेशनय् राजधानी व प्रदेशया नां क्वःछी कथं मुख्यमन्त्री डोरमणि पौडेलं तयारी यानाच्वंगु दु ।
३ नम्बर प्रदेशया अस्थायी राजधानी जुयाच्वंगु हेटौंडायात हे स्थायी राजधानी दयेकेमाःगु खँय् मुख्यमन्त्री पौडेलं अडान कयाच्वंगु दुसा हेटौंडायात स्थायी राजधानी दयेके मजिउ धकाः सत्तारुढ सांसदतय्सं तकं दबाब बियाच्वंगु दु । सत्तारुढ सांसदतय्सं ख्वप वा काभ्रेय् राजधानी तयेमाः धकाः लबिङ यानाच्वंगु दुसा मेखे मुख्यमन्त्री पौडेलं हेटौंडायात हे राजधानी दयेकेमाः धकाः पार्टीया उच्चस्तरीय नेतातय् दथुइ लबिङ यानाच्वंगु दु ।
अथे हे राजधानीया नां नेवाः–ताम्सालिङ तयेमाः धकाः आदिवासी जनजाति सांसदतय्सं प्रस्ताव दर्ता यानातःगु दुसा प्रदेशया नां गौरीशंकर जुइमाः धकाः प्रदेश सांसद विशान खड्कां प्रस्ताव हे दर्ता यानातःगु दु । सत्तारुढ नेकपाया छुं सांसदतय्सं प्रदेशया नां बागमति तयेमाः धकाः लबिङ यानाच्वंगु दुसा स्वनिगःया नेवाः सांसदतय्सं ‘नेपालमण्डल’ नां जुइमाः धकाः प्रस्ताव दर्ता यानातःगु दु ।
प्रदेशया राजधानी व नां निर्धारण यायेगु निंतिं पार्टीया शीर्ष नेतापाखें दबाब वयाच्वंगुलिं आः गुकथं न्ह्याः वनी धइगु अनुमान तकं यायेत थाकुयाच्वंगु खँ धाःगु दु । प्रदेशया राजधानी काभ्रे जुइमाःगु व प्रदेशया नां नेवाः–ताम्सालिङ जुइमाः धइगु अडानय् ८८ म्ह सांसदत छथाय् च्वनाच्वंगु दु ।
हेटौंडायात प्रदेशया राजधानी दयेकल धाःसा ११ गू जिल्लाया सांसदतय्त समस्या जुइ धासें उमिसं हेटौंडाय् राजधानी तयेमजिउ धकाः पार्टी दुने नं लबिङ यानाच्वंगु खँ नं सीदुगु दु ।
मुख्यमन्त्रीपाखें आलताल
प्रदेशया नां व स्थायी राजधानी तोके यायेगु सवालय् प्रदेश ३ या मुख्यमन्त्री डोरमणि पौडेलं पंगः थनेगु कुतः यानाच्वंगु द्वपं सांसदतय्सं बिउगु दु । पौडेल हेटौंडायाम्ह हे जूगु कारणं छुं जुयाः हेटौंडां राजधानी सारे यात धाःसा थःगु राजनीतिक छबी हे ध्वस्त जुइगु तायेकाः वय्कलं थ्व मुद्दायात आलताल यानाच्वंगु खँ सीदुगु दु । वय्कलं अन्तिमय् वनाः अझ नं निर्णय मयाकेफुगु सूत्रया अनुमान दु ।
LEAVE YOUR COMMENTS