‘साःगः’ साइकोलोजिकल ड्रामा खः : प्रदीप खड्गी

किपू नगरपालिकाया ग्वसालय् नकतिनि क्वचाः नेपालभाषा चिहा संकिपा कासा नकतिनि क्वचाल । थुगु चिहा संकिपा कासाय् डेल्टा मल्टिमिडिया प्रोडक्सनया न्ह्यब्वया ‘साःगः’ न्हाप, नेवाः युट्युबया न्ह्यब्वया ‘आजुद्यः’ ल्यू, शशीकला मानन्धरया न्ह्यब्वयाः ‘लाखेपाः’ लियांल्यू व फोकस पिक्चर्सया न्ह्यब्वया ‘न्हयेका सिँ’ यात हःपाः सिरपाः लात । चिहा संकिपा ‘साःगः’या निर्देशक प्रदीप खड्गी लिसे उदेन न्हूसाय्मिं सिरपाः त्याकूगु चिहा संकिपायात कयाः यानादीगु खँल्हाबल्हा :

साःगः चीहाः संकिपाय् अज्याःगु छु दु ? गुकिं न्हाप लाकेत सफल जुल ?
साःगः चीहाः संकिपा छगू साइकोलोजिकल ड्रामा खःसा थुकिया प्रस्तुतिकरणय् छगू बिस्कं पहः दु। गथेकि थुकिया हरेक पात्रयात न्ह्यब्वया मनोवैज्ञानिक रुपं न्ह्यब्वयागु दु। छगू ऐतिहासिक घटनाक्रमयात मनोवैज्ञानिकढंगं न्ह्यब्वयेफुगु हे थुकिया सशक्त पक्ष खःसा कलाकारया बजोड अभिनय मेगु पक्ष खः । संकिपाय् गुगु सिनेम्याटिक, रिजोलुसन बीत स्वयागु दु, उकिया हे कुतलं व संकिपा किपू नगरपालिका चीहाः संकिपाय्न्हा प लायेत ताःलाःगु खयेमाः धइगु जिगु बिचाः खः ।

थ्व संकिपां गज्याःगु सन्देश बीत स्वःगु दु ?
छुं नं संकिपां छगू सन्देश ज्वनातःगु दइ । साःगः चीहाः संकिपाय् बियातःगु सन्देश धइगु बांमलाःगु ज्या गथेकि कुकर्म यातकि न्ह्यागु हे याःसां नं मेपिंत जक मखु स्वयम थःत नं भिं जुइमखु धइगु सन्देश दु। प्याखनं बीत स्वःगु सन्देश नं थ्व हे खत ।

संकिपां किपूमितय्त गज्याःगु प्रभाव लाकत ?
थ्व संकिपापाखें किपूमि जक मखु सकल नेपाःमिपिंत किपूया बाखं सदृश्य कनेगु कुतः यानागु दु । बाखनं गुलि थुइकेगु कुतः याइगु खः, उकियात संकिपापाखें अझ ध्वाथुके फइ धइगु जिगु विश्वास खः। उकिं किपूया विषयय् गुलि नं न्यनाखँ दु, उकी थप खँ सीकेफत वा सीके फइ धइगु जिगु विश्वास खः ।

किपूया ऐतिहासिक पक्ष पिब्वयेत गुलितक सफल जू थें च्वं !
सफल ला पक्का हे जूगु दु। मजूगु खःसा चिहा संकिपा कासाय् न्हाप लाइ हे मखुत नि । सिरपाः ला अथें बीमखु नि ! जिगु निंतिं थ्व छुं नं संस्थां बिउगु साधारण सिरपाः मखु, थ्व राष्ट्रियस्तरया सिरपाः खः, उकिं जि थः सफल जूगु तायेकाच्वना ।

संकिपाय् दुथ्याकेत स्वयां नं दुथ्याके मफुगु वा मगाःमचाः छुं दु ?
मगाःमचाः यक्व हे दु। गुलि फु उलि यायेगु कुतः याना । ईया पावन्दीया कारणं माक्व याये फु थें मताल । अझ यायेमाःगु, याये जिउगु यक्वं दनि । तर छु न्ह्यब्वयेत स्वयागु खः, गुगु कुतः यानागु खः पूवन । थुकी हे जि लय्ताः ।

वइगु दिनय् छिगु न्हूगु वयेत्यंगु छुं दु ?
जि छम्ह प्रयोगात्मक संकिपा दयेके न्ह्याःम्ह खः । उकिं वइगु फागुन तकया दुने ‘साइन्स फिक्सन’ श्रृंखला ओटीटी प्लेटफर्मय् रिलिज यायेगु तयारी यानाच्वना ।