सकसितं नेपाल संवत् हनेत आह्वान याना ः राष्ट्रपति

येँ – राष्ट्रपति विद्यादेवी भण्डारीं नेपाल संवत् ११४२ न्हूदँया लसताय् छगू भिंतुना सन्देश पित बिसें नेपाल संवत् ११४२ पाखें सकल नेपाःमि दथुइ आपसी सद्भाव, सहिष्णुता व बन्धुत्वया भावना अभिवृद्धि यानाः राष्ट्रिय एकता सुदृढ यायेत थप ग्वाहालि याइगु विश्वास प्वंकादीगु दु ।

नेपाल संवत् ११४२ सुरु जूगु लसताय् स्वदेश व विदेशय् च्वनाच्वंपिं सकले नेपाःमि दाजुकिजा तकेहेँपिनि सुख, शान्ति व समृद्धिया निंतिं भिंतुना देछायादिसें राष्ट्रपति भण्डारीं लिच्छवी जुजु राघवदेवया इलय् स्वनिगलय् च्वंपिं किसान व गरिब जनतायात त्यासा मुक्त यानाः शंखधर साख्वाःनं संवत् प्रचलनय् हःगु खँ न्ह्यथनादिल ।

‘राष्ट्रिय विभुति साख्वाःया लोककल्याण व परोपकारी ज्याया स्मरण यासें निःस्वार्थ भावं समाजया हित, उन्नति व प्रगतिया निंतिं क्रियाशिल जुयाच्वने झी सकसितं प्रेरणा दइगु विश्वास प्वंकाच्वना’ वय्कःया भिंतुना सन्देशय् धयातःगु दु ।

‘आदिकाल निसें नेपाली समाज सभ्य व सहिष्णु जुया वयाच्वंगु दु । झीगु नखःचखः व थज्याःगु बांलाःगु परम्परां थुकियात थप सुदृढ यानायंकी । सांस्कृतिक व भाषिक रुपं विविधता दुगु नेपाली समाजय् सहिष्णुता व एकताया प्रवद्र्धन यायेगु उत्सवया रुपय् नेपाल संवत् हनेत सकसितं आह्वान याना’ राष्ट्रपतिं भिंतुना सन्देशय् धयादीगु दु ।

सम्बन्धित बुखँ

LEAVE YOUR COMMENTS