ने. सं. ११४६ बछलागा सप्तमी -

थेच्व नवदुर्गा देगःया ताःफ्वः चायेकल

यल (नेपालभाषा टाइम्स)- थेच्वया नवदुर्गा भवानी द्यःया देगलय् ग्वयातःगु ताःफ्वः चायेकूगु दु । नवदुर्गा भवानीया झिंनिदँया जात्रा संचालनया निंतिं वंगु गथांमुगः चः¥हेकुन्हु देगलय् ग्वयातःगु ताःफ्वः विहीवाः जुगःचः¥हेकुन्हु चायेकूगु खः ।

जात्रा शुरु जुइवं लछितक तालं ग्वयेगु परम्पराकथं गथांमुगःकुन्हु देगलय् ग्वयातःगु ताःफ्वः जुगःचः¥हे (पंजरां)कुन्हु सुथसिया ७ः३० ताः इलय् चायेकूगु खः । नवदुर्गा भवानी गुथिया मू नाइके भक्तलाल मालीयाकथं देगःया झिंप्यम्ह गुथियारतय्सं पुजा यायेधुंकाः देगःया ताःफ्वः चायेकूगु खः।

उगु इलय् गुथिया सकले गुथियारलिसें स्वीप्यम्हं देवगणपिं च्वनाः बलिसहितया विशेष पुजा याःगु खः । देगःया ताःफ्वः चायेकेवं आः देगः परिसरय् दयेकातःगु बल्चाय् देवगणयात प्याखं स्यनेगु ज्या न्ह्याइगु व वइगु मोहनिया चालंकुनहु यल लाय्कूलिसें पट्को त्वालय् नवदुर्गाया गंप्याखं न्ह्यब्वयेगु गुुथिया नायः धर्मराज मालीं कनादिल ।

मोहनिया चालंकुन्हु यल लाय्कूया मू चुकय् च्वंगु मानमानेश्वरी द्यःयात स्वां छानाः निथाय् प्याखं क्यनेगु व अनंलि साइत स्वयाः छन्हुया दिनय् दलचोकी तिनपाने भञ्ज्याङय् सिँ काः वनेगु ज्याझ्वः जुइगु वय्कलं जानकारी बियादिल । सिँ काः वनेधुंकाः यलया बालकुमारीइ द्यःयाथाय् फुलपातिकुन्हु होम याइ । थथे सिँ काः वनेबलय् स्वीन्याम्हेसिनं हयेमाःगु व पुजारीं कुबिया हःगु सिँया भारी धाःसा गनं मदिकुसे बल्चाय् हयाः तयेमाःगु नियम दुगु गुथिया नायः मालीं कनादिल ।

नवदुर्गा द्यःया झिंनिदँया जात्राय् फुलपातिकुन्हु भैरव, श्वेत भैरव, काली, बाराही, कुमारि, गणेश, ब्रम्हायणी, महाद्यः, विष्णुदेवी, महालक्ष्मी, सिंघिनी, ब्यांघिनी व इन्द्रायणीया ख्वाःपाः पुजा यानाः द्यः जागे याकेगु चलन दु । अनंलि अष्टमिया दिनय् झिंछम्ह देवगणं ख्वाःपाः पुनाः छझाः प्याखं क्यनेधुंकाः नवदुर्गा द्यःया देगलय् वइगु वय्कलं जानकारी बियादीगु दु ।

थनया नवदुर्गा द्यःया जात्राज्वःछि थीथीकथंया २८ ताजिया पुजा यायेमाःसा उकीमध्ये जात्राया झ्वलय् जुइगु थीथी पुजापाठमध्ये सुनागुथिइ जुइगु ‘कुल्पी यज्ञ’या विशेष महत्व दुगु वय्कलं कनादिल । चछियंकं जुइगु कुल्पी यज्ञय् न्हूगु ख्वाःपाः, तिसा वसःलिसें खड्गलिसें सकतां साधाना यानाः द्यः प्रतिस्थापन याइ ।

वइगु फागुन निसें चैत महिनातक जात्रा न्ह्याइगु झिंनिदँया जात्राया झ्वलय् थीथी पुजापाठया निंतिं ७६ गू लख स्वयां अप्वः खर्च जुइ । जात्राया निंतिं छुं ई न्ह्यः जक गोदावरी नगरपालिकाया प्रमुख गजेन्द्र महर्जनं ५० गू लखया बजेटया नं व्यवस्था याना बिउगु खः ।

थुगु जात्रा शुरु जुइवं गुगुं नं कथंया भ्वय् न्यायेके मजिउगु, इहिपा, इहि, कय्तापुजा थेंज्याःगु संस्कार याये मजिउगु, लापा थायेगु व सुलि पुइ मजिउगु, लाकां न्ह्याये मजिउगु, पिनें वःपिं पाहांपिंत बाय् बी मजिउगु लगायतया नियमत दु ।