कांग्रेस आन्दोलनय् सतक विस्तार ग्व ?
येँ – सतक विस्तार पीडित संघर्ष समितिं नेपाली कांग्रेसया नेता प्रकाशमान सिंहयात म्हिगः बुधवाः ज्ञापनपज्ञ लःल्हाःगु दु ।
नेपाली कांग्रेसं सरकारया अधिनायक वाद व कर अप्वयेकूगु खँय् आन्दोलन याना वयाच्वंगु दुसां सतक विस्तार पीडितया सम्बन्धय् धाःसा छुं न्वमवाः धासें उगु ज्ञापनपौ बिउगु खः । सर्वोच्च अदालतया पूर्ण पाठ वयेधुंकाः नं सरकारं पीडित जनताया सःयात कदर यायेगु स्वयां नं अदालतया हे अवज्ञा यानाः न्ह्याः वनेत स्वयांच्वंगु दु धासें थ्व खँयात कयाः नं कांग्रेसया धारणा स्पष्ट जुइमाःगु माग पीडिततय्सं याःगु खः ।
संघर्ष समितिया नायः सुमन साय्मि ‘नेपालभाषा टाइम्स’ लिसे खँ ल्हासें नेता सिंहं आन्दोलनया निंतिं स्थानीय जनता थम्हं हे कुतः यायेमाः धकाः लिसः बिउगु खःसा संघर्ष समितिं थीथी थासं आन्दोलनया ज्या न्ह्यानाच्वंगु दु धासें उगु आन्दोलनयात कांग्रेसपाखें नं समर्थन यायेमाःगु खँय् बः बिउगु खः ।
अथेहे संघर्ष समितिं आः याकनं हे प्रदेश नम्बर ३ या मुख्यमन्त्री डोरमणि पौडेलयात नं नापलानाः ज्ञापनपौ बीगु तयारी यानाच्वंगु जानकारी भाजु साय्मिं बियादिल ।
उकथं हे आः कांग्रेस सभापति शेरबहादुर देउवा लगायत मेमेगु पार्टीया अध्यक्षपिंत नं ज्ञापनपौ बीगु तयारी जुयाच्वंगु जानकारी नं वय्कलं बियादीगु दु ।
LEAVE YOUR COMMENTS