ने. सं. ११४४ कौलाथ्व पारू - नःलास्वनेगु

उपभोक्ता संरक्षण ऐन, लखौं जरिवाना पुलेमाली

गुगुं नं वस्तु मीबलय् छिं परिमाणय् म्हो यानाः उपभोक्तायात ठग यानाच्वनादियागु जकं मदुला ? अथे हे फय्गं व भ्रमपूर्ण विज्ञापन यानाः वस्तु मीगु याना वयाच्वनागु जकं दु ला कि ? यदि अथे खःसा थनिंनिसें हे अज्याःगु ज्या बन्द यानादिसँ, मखुसा उपभोक्ता संरक्षण ऐन, २०७५ या व्यवस्थाकथं छिं तःधंगु जरिवाना पुलेमालीगु जुइ ।

हालय् जक जारी जूगु ऐनं अनुचित व्यापारिक व व्यवसायजन्य क्रियाकलाप यायेत निषेध यानातःगु दु । उपभोक्ता संरक्षण ऐनया दफा १६ य् वस्तु वा सेवाया वास्तविक गुणस्तर, परिमाण, मू, नापतौल, ढाँचा वा बनावट आदियात ध्वं लायेगु, सुचुकेगु वा झंगः लानाः अज्याःगु वस्तु वा सेवा मी मदइगु व्यवस्था यानातःगु दु ।

अथे हे फय्गं व भ्रमपूर्ण विज्ञापन यायेगु वा भ्रमपूर्ण विज्ञापन यानाः वस्तु मीपिं व्यापारीयात नं कानुनं कठघराय् थने हइगु जूगु दु । बजाः अनुगमन, निरीक्षण, जाँचबुझ वा खानतलासीया इलय् तत्काल प्राप्त प्रमाणपाखें वस्तुया उत्पादक, ढुवानीकर्ता, संचयकर्ता, पैठारीकर्ता व विक्रेता वा सेवा प्रदायकं उपभोक्तायात ठगे याःगु लत धाःसा निरीक्षण अधिकृतं तत्काल जरिवाना याये फइगु उगु ऐनय् न्ह्यथनातःगु दु ।

वस्तु वा सेवाया वास्तविक गुणस्तर, परिमाण, मू, नापतौल, ढाँचा वा बनावट आदि ध्वं लानाः, सुचुकाः वा झंगः लानाः अज्याःगु वस्तु वा सेवाया विक्री विचरण यात धाःसा निरीक्षण अधिकृतं अनुगमन क्षेत्रय् हे निगूनिसें स्वंगू लाख तका तक जरिवाना याये फइगु ऐनय् व्यवस्था यानातःगु दु ।

अज्याःगु हे प्रकृतिया मेगु छुं नं ज्या याइपिं व्यापारीयात न्यय्द्वः तका निसें छगू लखतका जरिवाना जुइ । ऐनं निषेध यानातःगु ज्या दोहोरे यात धाःसा याक्वपतिकं जरिवाना याये फइगु व्यवस्था दु ।

बजाः अनुगमनय् खटे जूम्ह बजाः निरीक्षण अधिकृतं पैठारीकर्ता, ढुवानीकर्ता, संचयकर्ता व विक्रेतां विक्री प्रयोजनया निंतिं न्याःगु वस्तु वा सेवाया उत्पादक, खरिद बिल वा बिजक मल धाःसा न्याद्वःनिसें नीद्वःतका तक जरिवाना याये फइ । अथे हे गुगुं वस्तु व सेवा संचित यानाः वा मेगु छुं नं तरिकं कृत्रिम अभाव यायेगु व निर्धारित ई वा थासय् जक वस्तु वा सेवा विक्री यायेगु वा अज्याःगु हे प्रकृतिया मेगु छुं नं ज्या याइपिं व्यापारीयात न्यय्द्वः तका निसें छगू लखतका जरिवाना जुइ ।

ऐनं निषेध यानातःगु ज्या दोहोरे यात धाःसा याक्वपतिकं जरिवाना याये फइगु व्यवस्था दु । बजाः अनुगमन यायां उपभोक्ताया अधिकार संरक्षण यायेत लगे जुयाच्वंगु वाणिज्य, आपूर्ति व उपभोक्ता संरक्षण विभागं उगु ऐनयात प्रभावकारी कार्यान्वयन याना यंकेगु जुइ धाःगु दु । विभागं अनुगमनयात नं तीव्रता बिया वयाच्वंगु दु ।

अनुगमनया झ्वलय् बीगुमाःगु स्वयां म्हो परिमाणय् इन्धन विक्री याःगु लुइवं वंगु बुधवाः जक विभागं कागेश्वरी मनहरा नगरपालिका–९ (साविकया गोठाटार–७) स्थित भद्रकाली आयल स्टोरयात तत्काल निगू लाख तका जारिवाना याःगु खः । उगु स्टोरं उपभोक्तालिसें प्रतिलिटरय् २५ निसें ३५ एमएल इन्धन ठगी याना वयाच्वंगु लूगु खः ।

अनुगमन पुचलं उगु स्टोरयात जरिवाना वापतया ध्यबा छवाःया दुने विभागय् दाखिला यायेत निर्देशन तकं बिउगु दुसा नापं स्टोरया कारोवार नं रोके याना बिउगु दु । विभागया महानिर्देशक योगेन्द्र गौतनं उपभोक्ता ठगे याइपिंत तत्काल जरिवाना यायेत ऐन जारी जुइधुंकाः न्हापांगु घटना जूगु धयादिल ।

वय्कलं बजाःयात व्यवस्थित, मर्यादित व सन्तुलित यानातयेत अनुगमनयात प्रभावकारी रुपं न्ह्यः यंकाः निरन्तरता बिया वनेगु जुइ धयादिल । महानिर्देशक गौचनं धयादिल, ‘जिमिसं नखःचखः छुं नं मधासे अनुगमनयात निरन्तरता बिया वयाच्वनागु दु । मोहनिया इलय् नं उपभोक्त ठगे जुयाच्वने म्वाःलेमा धकाः स्वनिगलय् निगू पुचःयात परिचालन यानाः अनुगमनयात निरन्तरता बिया वयाच्वना ।’

विभागं ऐन जारी जुइ स्वयां न्ह्यः अनुगमनया झ्वलय् कैफियत लुया वल धाःसा सचेत यायेगु व शिलबन्दी यायेगु याना वयाच्वंगु खः । ‘अनुगमनया झ्वलय् कैफियत लुत धाःसा आः ऐनं व्यवस्था याःगु प्रावधानकथ कडा स्वयां कडा कारवाही यायेगु जुइ’ महानिर्देशक गौचनं धयादिल ।

ऐनया प्रभावकारी कार्यान्वयनया निंतिं नियमावली, मापदण्ड लगायत मेमेगु व्यवस्था यायेत सरकारं तयारी यानाच्वंगु वय्कलं कनादिल । उपभोक्ता अधिकारकर्मिं उपभोक्ता संरक्षण ऐनयात सार्थक रुपय् कार्यान्वयन यायेत सरकारं तत्काल नियमावली व कार्यविधि दयेकेमाःगु खँय् बः बिउगु दु ।

आः संरचनापाखें उपभोक्तायात ठगे यायपिंत कडा स्वयां कडा कारवाही याये मफइगु जूगुलिं विशेषज्ञसहितया चुस्त व पारदर्शी स्थायी संयन्त्र दयेकेमाःगु इमिगु धापू दु । विभागं उपभोक्ता अधिकार संरक्षणया निंतिं नियमित रुपं वस्तु व सेवाया आपूर्ति, मू, गुणस्तर, नापतौल, लेबल आदिया नं नियमन व अनुगमन याना वयाच्वंगु दु ।