जबरां फ्वन खुलाया म्याद
येँ – विवादय् वयेवं सम्मानपूर्ण बहिर्गमनया प्रस्ताव तयादीम्ह प्रधानन्यायाधीश चोलेन्द्र शम्शेर जबरां थःत खुला ज्या यायेत ई फ्वनादीगु खँ सीदुगु दु । वय्कलं थम्हं खुला लिपा स्वतः राजीनामा बीगु प्रस्ताव आन्दोलनरत न्यायाधीश व बारयात छ्वया हःगु खँ सूत्रं धाःगु दु । थ्व खुलाया अवधि दुने न्यायालय सुधारया लागिं छुं ज्या याना वनेगु इच्छा दुगु खँ नं वय्कलं धयादीगु सूत्रया दावी दु ।
तर वय्कःया थ्व प्रस्तावयात आन्दोलनरत न्यायाधीशतय्सं धाःसा स्वीकार याःगु मदुनि । वय्कलं धयादीगु थ्व खँ लिखित रुपं न्ह्यःने हयेत न्यायाधीशतय्सं वय्कःयात प्रस्ताव छ्वःगु खः । तर प्रधानन्यायाधीश राणां थ्व खँ लिखित रुपं बीत धाःसा अस्वीकार यानादीगु खः । वय्कलं खुला लिपा राजीनामा बी धइगु खँ लिखित बीत अस्वीकार यायेवं न्यायाधीशतय्सं वय्कःया मौखिक प्रस्ताव नं अस्वीकार याना छ्वःगु खः ।
राणालिसे खँ ल्हायेत न्यायाधीश–तय्सं न्यायाधीशपिं अनिल सिन्हा, सपना मल्ल प्रधानम व मनोजकुमार शर्मायात वार्ताया जिम्मा बिउगु खः । वय्कःपिंलिसे जूगु खँल्हाबल्हाय् हे प्रधानन्यायाधीश राणां थ्व प्रस्ताव तयादीगु खः । थ्व वार्ता टोलीं राणालिसे निगू चरण खँ ल्हायेधुंकूगु दु ।
सूत्रतय्सं धाः कथं न्यायाधीशतय्सं राणायात तत्काल राजीनामा मबीगु खःसा बिदा कयाः छेँय् च्वनादिसँ धकाः प्रस्ताव छ्वःगु खः । राणां न्हापा न्हापा नं आपत जुलकि न्ह्यागु नं जिउ धयाः लिपा हानं वेवास्ता याइगु कारणं वय्कःया मौखिक बचंयात पत्याः याये मफइगु खँ धाःगु दु ।
न्यायाधीशतय्सं आःयात बिदाय् च्वनाः वयां लिपा राजीनामा बिउसां जिउ धकाः तःगु प्रस्तावयात धाःसा प्रधानन्यायाधीश राणां स्वीकार याःगु मदुनि ।
न्यायालय दुने न्हापांनिसें अस्वस्थ ज्या याना वयाच्वंगु व लिपांगु इलय् फैसला वापत सरकारय् हे भाग फ्वंगु खँ सार्वजनिक जुइवं प्रधानन्यायाधीश विरुद्ध न्याय क्षेत्र आन्दोलित जूगु खः ।
शर्त माने याःगुलिं इजलाश च्वन
प्रधानन्यायाधीश थम्हं थः हे च्वनेगु कथं इजलाश तोके मयायेगु शर्तय् म्हिगःनिसें आन्दोलनरत न्यायाधीशत अदालतया ज्याय् लिहां वंगु दु । तर उमिसं आःया लागिं बन्दी प्रत्यक्षीकरण सम्बन्धी मुद्दा जक स्वयेगु खँ धाःगु दु । थ्व बाहेक मेमेगु मुद्दा धाःसा अझं स्वःगु मदुनि । म्हिगः वय्कलं थः व थः स्वयां क्वय् च्वंम्ह न्यायाधीश दीपकुमार कार्की बाहेक मेपिं न्यायाधीशपिं इजलाशय् च्वनेगु कथं खुगू इजलाश तोके यानादीगु खः ।
थःपिंसं धयागु सुझाव कथं राणा इजलाशय् मच्वनेगु जुइवं वय्कलं तोके यानादीगु इजलाशय् न्यायाधीशपिं च्वं वंगु खः । राणां थुकथं हे इजलाश तोके यात धाःसा आःया लागिं बन्दी प्रत्यक्षीकरणया मुद्दा स्वयेगु खँ धाःगु दु ।
LEAVE YOUR COMMENTS