नमूना बुद्ध विहारया उलेज्या

येँ – येँ मनपा वडा नं. १९ चिबहा ख्यःस्थित चिबहाः बौद्ध समाजया कुतलय् निर्माण जूगु नमूना बुद्ध विहारया उलेज्या जूगु दु । विहारया उलेज्या श्रद्धेय महासद्धम्मजोतिकधज भिक्षु बोधिसेन महास्थविरं यानाबिज्याःगु खः । वि.सं. २०६१ सालय् चिबहाः बौद्ध समाज नीस्वनाः तथागत बुद्धया ज्ञान व धर्म प्रचार प्रसार, स्वास्थ्य सम्बन्धी ज्याझ्वः यायेगु नापं बौद्ध विद्वानपिंत ब्वनाः धार्मिक प्रवचनया ज्याझ्वः याना वयाच्वंगु खः ।

थ्व झ्वलय् २०६५ साल असार १४ गते श्रद्धेय त्रिपिटकाचार्य उपसंघनायक भिक्षु कुमार काश्यप महास्थविरं विहारया जग स्वनाबिज्याःगु खः ।
नमूना बुद्ध विहार निर्माणया ज्या पूवंक क्वचायेकाः जूगु उलेज्याझ्वलय् मूपाहां भिक्षु बोधिसेन महास्थविरं विहारया मूलुखाय् रिबन चानाः, विहारया दुनेया धम्महलय् च्वंगु बुद्धमूर्तिया धकिं उलेज्या याना बिज्याःगु खः ।

औपचारिक ज्याझ्वः न्ह्यः बोधिमत च्याकाः नाय्खिं बाजंसहितं विहारतक छगू पदयात्रा नं याःगु खः । शील प्रदानलिसें बुद्धपुजा यानाः न्ह्याःगु ज्याझ्वलय् मूपाहां भिक्षु बोधिसेन महास्थविरं बःचाहाकलं ओवाद बियाबिज्यासें विहार नांयात सार्थक यायेकथं उपासकउपासिकापिंसं यायेमाःगु ज्याया बारे कनाबिज्याःगु खः ।

समाजया नायः भाजु भानुभक्त शाहीया सभापतित्वय् जूगु ज्याझ्वलय् विशेष पाहांकथं येँ महानगरपालिकाया मेयर विद्यासुन्दर शाक्य, उपमेयर हरिप्रभा खड्गी श्रेष्ठ, येँ मनपा १९ वडाअध्यक्ष शशीलाल श्रेष्ठ झायादीगु खः । भाजु अनिल तुलाधरं लसकुस म्येँ न्ह्यब्वयादीगु ज्याझ्वलय् विहार निर्माणया निंतिं दातापिंत ज्याझ्वःया मूपाहांपाखें सुभाय् पौ लःल्हाःगु खः ।

समाजया नायः भाजु शाहीं लसकुस यानादीगु ज्याझ्वलय् येँ मनपाया मेयर, उपमेयर व १९ वडाअध्यक्षं थःथःगु नुगःखँ तयादीगु खःसा समाजया न्वकु पूर्णप्रसाद शाहीं भवन निर्माणया आर्थिक ल्याःचाः न्ह्यब्वयादीगु खः । समाजया सल्लाहकार शान्तरत्न शाक्यं सुभाय् देछानादीगु खः ।