ने. सं. ११४४ ञलाथ्व नवमी -

फोहर व्यवस्थापनया निंतिं मनपा व क्याम्पस दथुइ सहकार्य

येँ – येँ महानगरपालिकां फोहर व्यवस्थापनया निंतिं क्याम्पसलिसें सहकार्य याःगु दु । लिसें मनपां फोहर व्यवस्थाया निंतिं घरदैलो ज्याझ्वः नं न्ह्याकूगु दु । येँ मनपा वातावरण व्यवस्थापन विभागं फोहर व्यवस्थापनया निंतिं न्हू बानेश्वरया बुद्धनगरय् च्वंगु कादम्बरी क्याम्पसलिसें सहकार्य याःगु खः । क्यामपसलिसेया सहकार्यलिपा छुं दिं न्ह्यपंनिसें छेँखाछेँखाय् वनाः फोहर व्यवस्थापन सचेतना ज्याझ्वः नं न्ह्याका वयाच्वंगु दु ।थ्व स्वयां न्ह्यः मनपां थुकथंया ज्याझ्वः टेकु, कालिमाति, कलंकि, रवि भवन, कुलेश्वर, बल्खु, थापाथली, त्रिपुरेश्वर, न्हू बानेश्वर लगायतया थासय् नं संचालन याये धुंकूगु दु ।

वातावरण व्यवस्थापन विभाग, कार्य संचालन शाखा प्रमुख नगर प्रहरी निरीक्षक मीनबहादुर थापां कनादीकथं थुगु ज्याझ्वः वइगु चैत मसान्ततक न्ह्याइ । ज्याझ्वः कथं सुथसिया १० ताः इलंनिसें सनिलया ३ ताःई तक विभागया पदाधिकारी व क्याम्पसया विद्यार्थीपिनिगु प्यंगू न्यागू पुचः जानाः उकथंया ज्याझ्वः न्ह्याका वयाच्वंगु दु । सर्वसाधारणं लाक्वपाक्व धंगं न्ह्यःने लाःथाय् फोहर वांछ्वयेगु यानाच्वंगु व थज्याःगु बानीइ हिउपाः मवःगुलिं हे उकथंया ज्याझ्वः न्ह्याकागु मनपां न्ह्यथंगु दु । छेँखां पिहां वःगु फोहरयात उपयुक्त थासय् जक व्यवस्थापन यायेत इनाप यासें घरदैलो ज्याझ्वः न्ह्याका वयाच्वंगु खः । येँ महानगर लागां जक न्हियान्हिथं ४०० टन स्वयां अप्वः फोहर संकलन यायेगु ज्या जुयाच्वंगु दु ।