येँय् थप ३म्ह सहित २०१म्हेसित कोरोनाया संक्रमण

येँ – येँय् हानं ३म्हेसित कोरोनाया संक्रमण जूगु पुष्टि जूगु दु । स्वास्थ्य तथा जनस्वास्थ्य मन्त्रालयं येँया काठमाडौं मेडिकल कलेज व तोखाय् च्वंपिं ३म्हेसित कोरोनाया संक्रमण जूगु पुष्टि याःगु दु । अथेहे वंगु नीप्यघौया दुने थप २ सय १म्हेसित कोरोनाय संक्रमण जूगु दु ।

येँया राष्ट्रिय जनस्वास्थ्य प्रयोगशालाय् याःगु परीक्षणय् धनुषाया १म्ह, कपिलवस्तुया २म्ह, नवलपरासीया ८म्ह, येँया ३म्ह, रौतहटया ११म्ह, रुपन्देहीया १म्ह, सर्लाहीया १५म्ह व सिन्धुपाल्चोकया १म्ह यानाः ४२म्हेसित संक्रमण जूगु दु ।

अथेहे विराटनगर, धरान, नारायणी, सुर्खेत, कोशी, सेती, रुपन्देही, जनकपुर, कर्णाली व राप्तीया प्रायेगशालाय् याःगु परीक्षणय् थप १ सय ५९म्ह मनूतय्त संक्रमण खनेदुगु खः ।

आः नेपालय् संक्रमिततय् ल्याः २३ सय थ्यंगु दु । उकी मध्ये २१ सय ३०म्ह मिजंत खःसा १ सय ७०म्ह मिसात खः । थौं तेह्राथुम, ताप्लेजुङ व पाँचथरय् नं न्हपांगु खुसी संक्रमण खनेदुगु दु । थप स्वंगू जिल्ला नापं ६४गू जिल्लाय् संक्रमण खनेदुगु दु ।