
येँ – नेपाल संवत् न्हूदँ राष्ट्रिय समारोह समिति–११४२ पाखें पलिस्था याःगु नेपाल संवतया प्रवर्तक शंखधर साख्वाःया मूर्ति उलेज्या जूगु दु । उगु हे ज्याझ्वलय् वंगु न्हूदँ ११४० भिंतुना ¥यालीइ ब्वति काःगु थीथी खलः पुचःया बाजं खलःयात केपु इनेज्या नं जूगु खः ।
नेवाः न्ह्यलुवा मल्ल के. सुन्दरं समारोह समितिं पलिस्था याःगु शंखधरया मूर्ति उलेज्या यानादीगु खः । उगु मूर्ति समारोह समितिं न्हूदँया लसताय् जुइगु थीथी ज्याझ्वलय् ब्वज्या यायेगु कथं पलिस्था याःगु खःसा कलाकार सन्तकुमार महर्जनं उगु मूर्ति दयेकूगु खः ।
ज्याझ्वलय् येँ महानगरपालिकाया उपमेयर हरिप्रभा खड्गी श्रेष्ठ, नेवाः न्ह्यलुवाः मल्ल के. सुन्दर, समारोह समितिया सल्लाहकार डा. त्रिरत्न मानन्धरपिंसं न्हूदँय् ब्वति काःगु १६८ गू खलः पुचःया बाजं खलःयात खादा न्ययेकाः केपु लःल्हानादीगु खः ।
न्हूदँ समारोह समिति ११४२ या नायः निरञ्जनरत्न शाक्यया सभापतित्वय् जूगु उगु ज्याझ्वलय् लसकुस मचाराजा महर्जनं यानादीगु खःसा न्हूदँ ११४२ या सकतां ज्याझ्वःया धलः ज्योति शाक्यं ब्वनाः न्यंकादीगु खः ।
समितिया दुजः उमेश स्थापितं न्ह्याकादीगु उगु ज्याझ्वलय् नानीहेरा महर्जनं सुभाय् बियादीगु दु । अथेहे न्हूदँ समारोह समितिं ११४२ न्हूदँया सांस्कृतिक ¥याली ताःलाक न्ह्याकेगु नितिं येँया थँहितिइ नासःद्यः पुजा यानाः प्रसाद ग्रहण ज्याझ्वः नं याःगु खः ।
पद्मरत्न लुमंति ज्याझ्वः
नेपाल संवत् आन्दोलनया प्रणेता पद्मरत्न तुलाधर मदुगु स्वक्वःगु पूण्यतिथिइ न्हूदँ समारोह समिति ११४२ पाखें येँया शंखधर पार्कय् येँ महानगरपालिकां पलिस्था यानातःगु पद्मरत्न तुलाधरया झ्वाताय् माल्यार्पण ज्याझ्वः याइगु जूगु दु । समारोह समिति ११४२ या म्हिगः च्वंगु मुँज्यां तुलाधरयात लुमंकेगु ज्याझ्वः यायेगु निर्णय याःगु खः ।
समारोह समितिं बिउगु जानकारी कथं ने.सं. ११४२ कछलाथ्व द्वादसी (कार्तिक १६ गते) मंगलवाः सुथय् ७ ताः इलय् समारोह समितिया सकल दुजःपिं व तुलाधरप्रति आस्था दुपिं व्यक्तित्वपिं मुनाः वय्कःया झ्वाताय् माल्यार्पण यायेगु ज्याझ्वः दयेकूगु दु ।
समारोह समितिं नेपाल संवत आन्दोलनया प्रणेता तुलाधर मदुगु दँय् न्हूदँया सकतां ज्याझ्वः स्थगित याःगु खःसा वयां लिपाया दँनिसें शंखधर दिवसया दिं लाकाः वय्कःया लुमन्तिइ ज्याझ्वः याना वयाच्वंगु खः ।
वंगु दँ ११४० या शंखधर दिवसया न्हि कुन्हु भाजु पद्मरत्न तुलाधरया विचाः गोष्ठी याःगु खः ।
LEAVE YOUR COMMENTS