चीनय् फोटो पत्रकार श्रेष्ठया किपा ब्वज्या

येँ- राष्ट्रिय समाचार समिति (रासस)या फोटो पत्रकार रत्नृकष्ण श्रेष्ठया चीनया राजधानी बेइजिंगस्थित नेपाली राजदूतावासय् याकः किपा ब्वज्या जूगु दु । बेइजिंग इन्टरनेशनल चाइनिज कलेजया ग्वसालय् व येँया कलंकीइ च्वंगु एलआरई स्कुलया संयोजनय् जूगु चिनिया भाषा प्रशिक्षण ज्याझ्वलय् ब्वति कायेत उखे झयाच्वनादीम्ह वय्कलं थःगु याकः किपा ब्वज्या यानादीगु खः । ब्वज्याय् स्वंगू दर्जन स्वयां अप्वः किया दुथ्याकातःगु दु ।

किपा ब्वज्या अवलोकन यानादिसें चीनया निंतिं नेपाःया राजदूत लिलामणि पौड्यालं थज्याःगु गतिविधिं निगू देय्या स्वापूयात अझ क्वातुकेत ग्वाहालि जुइगु विश्वास प्वंकादिल । वय्कलं ब्वज्याय् तयातःगु किपात दूतावासय् हे दइगु जानकारी बियादिसें मेमेगु थासय् नं ब्वज्या यानाः निगू देय्या स्वापूयात अझ बांलाका यंकेगु जुइ धयादिल । उगु इलय् दूतावासया नियोग उपप्रमुख सुशीलकुमार लम्सालं नेपाली किपा ब्वज्या जुइगु गौरवया विषय जूगु खँ न्ह्यथनादिल ।

फोटो पत्रकार श्रेष्ठं चीनय् यानादीगु थ्व निक्वःगु किपा ब्वज्या खः । थ्व स्वयां न्ह्यः वंगु बैशाखय् नं वय्कलं बेइजिंगय् हे किपा ब्वज्या यानादीगु खः । ब्वज्याय् नेपालय् कयातःगु ऐतिहासिक सम्पदा, पर्यटकीय स्थल, थीथी जातजातिया प्याखं व विशिष्ट व्यक्तित्वपिनिगु किपा तयातःगु दु ।

किपा ब्वज्यां चिनिया जनतां नेपाः व नेपाली संस्कृतियात थुइकेत ग्वाहालि जुइगु जूगुलिं नेपाःया पर्यटन ख्यःया नं प्रवद्र्धन जुइगु विश्वास कयागु भ्रमण पुचःया संयोजक सन्तु महर्जनं कनादिल ।