स्वपु म्येया म्युजिक भिडियो पिदन

येँ (नेपालभाषा टाइम्स)- कलाकार व निर्देशक आराध्यलक्ष्मी खडगीं दच्छिति ‘न्ह्यः छंके छु दु जिं छुं मस्यू’ धयागु म्ये हालाः गायन क्षेत्रय् पलाःतःगु म्येया म्युजिक भिडियोय् आराध्यलिसे हिरो जुयाः म्हितूम्ह विजयमान सिं हाकनं छकः आराध्यलिसे हे हिरो जुया खनेदयेकः वःगु दु ।

बिहीबार विश्वज्योति हलय् प्रीमियर जूगु स्वपू म्येया म्युजिक भिडियो मध्ये निपु म्ये ‘छंगु मतिना’ व ‘पानबति मैंचा’य् विजयमान हिरो जुयाः खनेदयेकः वःगु खः । प्रीमियर जूगु स्वपुं म्येया कोरियोग्राफर आराध्यलक्ष्मी हे खःसा ‘लिक्क लिक्क’ छपुया बाहेक निपु म्येया म्युजिक भिडियोया निर्देशन नं आराध्य मय्जुं यानादीगु खः । छपु म्येया निर्देशन राजेशमान सिंहं यानादीगु खः ।

प्रिमियर ज्याझ्वलय् नेपाःया नांजाम्ह कलाकार चैत्यदेवी सिं मूपाहां कथं झायादीगु खःसा लोककवि राजभाई जकःमि, वरिष्ठ गायक जुजुकाजि रंजित, वरिष्ठ कलाकार नारायणदेवी प्रधान, कलाकार हिसिला महर्जन, कला व साहित्य अन्वेषक प्रकाश साय्मि व निर्देशक विजयरत्न असंबरे पाहाँ कथं झायादीगु खः । मतिना इन्टरटेन्टमेन्टया ग्वसालय् जूगु प्रिमियर ज्याझ्वः विजयमान सिंया सभापतित्वय् जूगु खः ।

बिहिवाः प्रिमियर जूगु निपू म्येय् निशा देशारया सः थ्वयाच्वंगु दुसाः छपु म्येय् वयात राजकुमार मानन्धरं साथ बियातःगु दु । प्रिमियर जूगु मध्ये छपु म्ये डबल शाक्य व रत्नशोभा महर्जनं हालादीगु “लिक्क लिक्क” बोलया म्ये खः । थ्व स्वपु मध्ये छपु ‘छंगु मतिना’ मतिना इन्टरटेन्टमेन्टया युट्युबपाखें पिदंगु दु