लाखेप्याखं संरक्षणय् तनहुँया नेवाः
येँ(नेपालभाषा टाइम्स)- तनहुँ दमौलीया नेवाःत मौलिक परम्पराया लाखेप्याखं संरक्षण यायेगु ज्याय् न्ह्यचिउगु दु । लिपांगु इलय् लाखेप्याखं लोप जुया वनीगु स्थिति वयेवं तनहुँ दमौलीया नेवाःत प्याखं संरक्षण यायेगु ज्याय् न्ह्यचिउगु खः । लाखेप्याखं संरक्षण यायेगु ल्याखं दमौलीइ लाखेप्याखं कासाया ग्वसाः ग्वःगु खः।
छखे आधुनिकतां हा कया हयाच्वंगु व मेखे आःया पुस्तां लाखेप्याखंयात उलि महत्व मबीवं थनया मौलिक प्याखंया रुपय् दयाच्वंगु लाखेप्याखं लोप जुइगु अवस्थाय् थ्यनेवं स्थानीय नेवाःत प्याखं संरक्षणय् न्ह्यचिउगु खः ।
आः न्हू पुस्तां लाखेप्याखंयात उलि महत्व व प्राथमिकता मबीवं प्याखं हे लोप जुइगु अवस्था थ्यंगु धासें राष्ट्रिय स्तरया लाखेप्याखं कासया ग्वसाः ग्वयाः प्याखं संरक्षण यायेगु ज्याय् थनया नेवाःतय्सं सक्रियता क्यना हःगु खः । संस्कार, संस्कृति व मौलिक परम्परा ल्यंका तयेगु उद्देश्यलिसें लाखेप्याखंया संरक्षण यायेगु उद्देश्यं बन्दीपुर नगरपालिका १ या डुम्रेय् राष्ट्रियस्तरया लाखेप्याखं कासाया ग्वसाः ग्वःगु खः ।
डुम्रे सांस्कृतिक तथा सामाजिक संरक्षण समितिया ग्वसालय् वंगु शनिवाः जूगु लाखेप्याखं कासाय् स्वनिगः, स्थानीय व मेमेगु थाय्या स्वीछगू लाखेप्याखं पुचलं ब्वति काःगु खः । कासाय् ख्वपया विश्वकर्मा लाखेप्याखं न्हाप, तनहुँया डुम्रेय् च्वंगु झीगु नेवाः पुचः लिउ व बन्दीपुरया खड्कमाई सांस्कृतिक पुचः लियांलिउ लाःगु खः ।
कासाय् न्हापयात ४०,५५५÷–, लिउयात २०,५५५÷– व लियांलिउयात ५,५५५÷तका दां सिरपाः लःल्हाःगु खः । समितिया संयोजक घनश्याम श्रेष्ठं लाखेप्याखं नेवाः समुदाय मौलिक परम्परा जूगुलिं थुकिया संरक्षण यायेत थुकथंया कासा ग्वसाः ग्वयागु जानकारी बियादिल । वय्कलं विगतय् लाखेप्याखं ल्हुइकेबलय् छगू बिस्कंकथंया मनोरञ्जन, उत्साह व आत्मीयता दया वयाच्वंगु खःसा आः वयाः थुकिया आकर्षण व रुचीइ म्होचि वयाच्वंगु धयादिल ।
LEAVE YOUR COMMENTS