न्हूगु अभियानय् नेवाः राजनीतिक अभियान
‘स्वनिगःया आदिवासी नेवाःतय्त गबलेतक राजनीतिक रुपं सचेत व क्रियाशिल यानाः न्ह्यःने यंके फइमखु अबलेतक नेवाःतनापं समग्र नेवाः समाज न्ह्यःने वने फइमखु ।’ थ्व खँयात वाःचायेकाः थौ स्वयां खुदँ न्ह्यः नीस्वंगु संस्था खः नेवाः राजनीतिक अभियान । नेवाः न्ह्यलुवा डा. महेशमान श्रेष्ठ संरक्षक जुया च्वनादीगु थुगु अभियानया नायः थौंकन्हय् श्रीकृष्ण मानन्धर खःसा थ्व स्वयां न्ह्यःयाम्ह नायः रविन्द्र श्रेष्ठ खः ।
नेवाःतय्त राजनीतिक रुपं सचेत यायेगु अभियानया झ्वलय् आतकया दुने नीप्यंगू ‘नेवाः ग्वहालि पुचः’ तकं नीस्वना नेवाःतय्गु हक अधिकारया निंतिं निरन्तर क्रियाशिल जुयाच्वंगु सम्भवतः थ्व हे छगू जक संस्था नेवाः राजनीतिक अभियान खः ।
थुगु अभियानं लिपांगु इलय् हरेक वाःया विहीवाःपतिकं नेवाःतय्गु हक अधिकार नापं आन्दोलननाप स्वापू दुगु विषयवस्तुयात कयाः सरोकारवाला व्यक्तियात पाहांकथं ब्वनाः बिचाः तयेके बीगु व अन्तक्र्रिया ज्याझ्वः यानाच्वंगु दु ।
गबलें विश्वया थीथी थासय् वनाः अनया आदिवासी जनजातिया बारे थुइकेगु, गबलें नेवाःतनाप स्वापू दुगु आन्दोलनया ल्याखं गुथि विधेयक, सतक विस्तार, फास्ट ट्र्याक निर्माण, सम्पदा संरक्षण, पुनःनिर्माण लगायत थीथी सवाल अले गबलें नेवाः आन्दोलनया लँपुयात कयाः सहलह ब्याकेगु व अन्तक्र्रिया ज्याझ्वः याना वयाच्वंगु दु ।
नेवाः राजनीतिक अभियानपाखें आतक डा. महेशमान श्रेष्ठ, मल्ल के. सुन्दर, राजेन मानन्धर, कृष्णगोपाल भायो, श्रीकृष्ण महर्जन लगायतया दर्जनौं सरोकारवालापिंत पाहांकथं ब्वनाः न्वचु तयेके बीगु व अन्तक्र्रिया यायेगु ज्या जुइधुंकूगु दु ।
लिपांगु इलय् थुगु संस्थां याना वयाच्वंगु थुकथंया ज्याझ्वलय् सरकारं हःगु गुथि विधेयकय् केन्द्रीत जुयाः हे अप्वः ज्याझ्वः जूगु दुसा गबलें सम्पदा व गबलें नेवाःतय् संस्कृतिनापं स्वापू दुगु थीथी सवालयात कयाः नं ज्याझ्वः याना वयाच्वंगु दु ।
अभियानं लिपांगु इलय् हरेक वाःया विहीवाःपतिकं नेवाःतय्गु हक अधिकार नापं आन्दोलननाप स्वापू दुगु विषयवस्तुयात कयाः सरोकारवाला व्यक्तियात पाहांकथं ब्वनाः बिचाः तयेके बीगु व अन्तक्र्रिया ज्याझ्वः यानाच्वंगु दु ।
आतक आपालं विषयय् केन्द्रीत जुयाः ज्याझ्वः यायेधुंकूगु जूसां लिपांगु इलय् नेवाः अधिकार, स्वनिगःयात ‘नेवाः सांस्कृतिक स्वायत्त क्षेत्र’ दयेका वनेगु सवालय् गुगु ज्याझ्वः व ईकथं ल्वःगु व थौंया इलय् याये हे माःगु ज्याझ्वःकथं नालाः नेवाः राजनीतिक अभियानया ल्याय्म्हत सक्रिय जुया वयाच्वंगु दु ।
‘छुँ जुया दुहां वनाः धुँ जुयाः पिहां वयेगु’ खःसा आःया इलय् संविधानया आधारय् स्वनिगःयात ‘नेवाः सांस्कृतिक स्वायत्त क्षेत्र’ घोषणा याकेगु नीतिसहित योजना दयेकाः वनेमाः धकाः आदिवासी जनजातिया अभियन्तानापं पत्रकार श्रीकृष्ण महर्जनं तयादीगु थ्व बिचाःयात नेवाः राजनीतिक अभियानं तसकं सकारात्मक रुपय् काःगु दु ।
विशेषतः स्वनिगःया आदिवासी नेवाःतय् हक अधिकार, थनया सांस्कृतिक, धार्मिक, ऐतिहासिक, पुरातात्विक महत्वया स्मारक व सम्पदाया संरक्षण, नेवाःतय्त न्ह्यःने यंकेत थवंथवय् विभाजित मखु छप्पँ जुयाः वनेमाःगु धइगु खँयात वाःचायेकाः, राजनीतिक रुपं सत्तापक्ष, प्रतिपक्ष, नेवाः लगायत आदिवासी जनजाति, मधेसी, खस आर्यतय्गु तकं समर्थन कयाः ‘नेवाः सांस्कृतिक स्वायत्त क्षेत्र’ घोषणा याकेगु आज्जुसहित वनेमाः धइगु बिचाः तकं अन वःगु खः ।
स्वनिगःयात ‘नेवाः सांस्कृतिक स्वायत्त क्षेत्र’ घोषणा याकेगु धइगु स्वनिगःयात नेवाः संस्कृतिक स्वायत्ता बीगु खः । थथे स्वायत्तता बीगु धइगु नेवाःतय्गु संस्कृतिनापं हक अधिकार नं स्वाना वइगु अवस्था दु । उकिया निंतिं जनस्तरय् हे थुइका वनेत अभियान न्ह्याकेमाः धइगु विचाः नं अन वःगु खः ।
न्वचु तयेगु व अन्तक्र्रियाया झ्वलय् अन वःगु थुकथंया बिचाःयात आःया अवस्थाय् नेवाःतय्गु सकतांकथंया समस्या समाधानया निंतिं मंकाः लँपु जुइ फइगु अवस्था दुगु खँय् डा. महेशमान श्रेष्ठ, शाक्य सुरेन, श्रीकृष्ण मानन्धर, रविन्द्र श्रेष्ठ, अभियानया दुजःपिं नापं ज्याझ्वलय् ब्वति कयादीपिं सकसिनं थःथःगु मत तयादीगु खः ।
अन जूगु उकथां सहलह लिपा आः नेवाः राजनीतिक अभियानं थःपिनिगु ग्वहालि पुचःनापं मेमेगु खलः पुचःलिसे नं स्वनिगःयात ‘नेवाः सांस्कृतिक स्वायत्त क्षेत्र’ घोषणा याकेगु निंतिं योजनासहित न्ह्याः वनेमाःगु आवश्यकतायात वाःचायेकाः अभियान हे न्ह्याकूगु दु ।
थ्व ल्याखं स्वयेगु खत धाःसा थौंया इलय् नेवाः राजनीतिक अभियानपाखें थ्व गुगु अभियान न्ह्याकूगु दु, व वास्तवय् थौंया आवश्यकता हे खः । स्वनिगःयात ‘नेवाः सांस्कृतिक स्वायत्त क्षेत्र’ घोषणा याकेगु अभियानयात याकनं हे सार्वजनिक बहसया रुपय् तकं पित हयेगु योजना तकं अभियानं याःगु दु ।
LEAVE YOUR COMMENTS