प्रधान न्यायाधीशया बचाउलय् नेतात

थःपिनि ससःदाजु गजेन्द्र हमालयात मन्त्री दयेकूगु धकाः प्रधान न्यायाधीश चोलेन्द्र शम्शेर राणा प्यखेरं हमलाया शिकार जूगु दु । आपाःसिनं न्यायपालिका दुने जुयाच्वंगु थ्व बेथितिया हे उत्कर्षकथं काःगु दु । तर प्रधान न्यायाधीश चोलेन्द्र शम्शेरं राजिनामा बिइमाः धाइगु पक्षय् माओवादीपाखें न्हापा न्यायाधिवक्ता जुइधुंकूम्ह रमण श्रेष्ठ व माओवादी पाखें हे राष्ट्रिय सभाय् सांसद जूम्ह राम नारायण विडारी धुँवाधार रूपं कुहाँ वसेंलिइ थुकी माओवादी नायः प्रचण्डया हे ल्हाः दुगु धकाः नं मनूतसें धयाहःगु दु । थुगु विषयस थीथी कोणं चर्चा परिचर्चा जुयाच्वंगु दु ।

गथेकि असार २८ गते संसद पुनस्र्थापना यानाः शेर बहादुर देउवायात प्रधानमन्त्री दयेकेत राष्ट्रपतिया नामय् परमादेश जारी याःगु हुनिं सुनां सुनां चोलेन्द्र शम्शेरयात देवत्वकरण यात, इमिसं हे वयात दानवीकरण यात धकाः नं खँ पिहाँ वयाच्वंगु दु ।

वंगु कतिं पुन्हि (कार्तिक ३) खुन्हु प्रचण्डं बालुवाटारय् गठबन्धनया पार्टीतय्गु मुँज्या धुंकाः अन हे सत्तीक च्वंगु प्रधान न्यायाधीश चोलेन्द्रया क्वार्टरय् वनाः बागू घण्टातक गोप्य भेटवार्ता याःगु खः । थुगु भेटवार्ता लिपा हे प्रन्या चोलेन्द्र विरुद्धया मुहिम तच्वःगुलिं नं अन प्रचण्डं याःगु बार्गेनिङ्ग चोलेन्द्रं माने मजूगु खनेदुगु दु ।

आखिर चोलेन्द्र शम्शेरयात प्रधानन्यायाधीश दयेकेगु ज्याय् ला शेर बहादुर देउवा, केपी शर्मा ओली व पुष्पकमल दाहालया हे ल्हाः दु । थ्व खँ राष्ट्रिय जनमोर्चाया सांसद चित्र बहादुर केसीं न्ववानातःगु अन्तर्वार्ता ला सामाजिक सञ्जालय् बय्बय् हे जूगु खः । थुकथं स्वयेगु खःसा चोलेन्द्र प्रधानन्यायाधीश जूगु हे नेपालय् जुयाच्वंगु बेथितिया छगू दसु खः । गजेन्द्र महत धाइम्ह प्रधान न्यायाधीशया ससः दाजु धकाः सकसिनं सिइ हे धुंकूगु दु । थ्व मनू दलगत ल्याखं काँग्रेसया मनू खः धाःसा हानं चोलेन्द्रयात प्रधान न्यायाधीश दयेकेत देउवायात धाःम्ह व लबिङ्ग याःम्ह मनू धकाः नं खँ थथे जुयाः वयापाखें थिति बसे जुइ धकाः आशा यायेगु हे बेकार खः ।

निक्वःतक जूगु संसद विघटनयात बदर यानाः संसद पुनस्र्थापन यानाबिउगु जूसां फागुन २३ गतेया चोलेन्द्रया फैसलां माओवादीयात तःधंगु घाटा जुल । माधव नेपाल व प्रचण्ड मिले जुयाः नेकपाया बहुमत थःगु पक्षय् कयाः केपी ओलीयात साधारण सदस्यतक मदइगु यानाः निष्कासन यानाछ्वयागु घोषणा यानाबिइधुंकूगु खः । निर्वाचन आयोगं अलमल यानातःगु जूसां थ्व फैसला मजूगु खःसा ओलीं मेगु पार्टी चायेकेमालीगु अवस्था वइगु खः । तर फागुन २३ गतेया फैसलां माओवादी व एमाले दथु्इ एकता जुयाः खडा जूगु नेकपाया अस्तित्वयात माने मयासें एमाले व माओवादी निगू ब्यागः ब्यागः हे पार्टी धकाः धाल । थुकथं एमाले दुने दुहाँ वनाः थःगु व माओवादीया स्थिति बल्लाकेगु गुगु योजना खः, प्रचण्ड उकी फेल जुल

। थुलि जक मखु, थ्व जुइवं हे एमाले नायः केपी शर्मा ओलीं फागुन २८ गते थःगु पक्षया केन्द्रीय कमितिया मुँज्या न्ह्याकाः माधव नेपाल व झलनाथ खनायात बेदखल यानाबिल । केपी ओली माओवादीलिसे एकीकरण जुइन्ह्यःया केन्द्रीय कमिति मखुसें एकीकरण धुंकाः कायम जूगु केन्द्रीय कमितियात न्ह्याकल । थुकी माओवादीत त्वःता वनेधुंकूगु जूगुलिं ओलीया हे बहुमत खात । नापं माओवादी धकाः मवंसें च्वंपिं माओवादी नं ओलीया पक्षय् लगे जुल । थुकथंया स्थिति पिहाँ वयेकेगु ज्या ला सर्वोच्च अदालतं यानाबिउगु खः । ऋषि कट्टेलं ला थःगु पार्टीया नांलिसे नेकपा (नेकपा) या नां ल्वात धकाः जक रीट तःगु खः ।

एकीकरण हे बदर यायेमाल धकाः धाःगु नं मखु, धायेगु ला हकदैया नं दुगु खँ मखु । तर सर्वोच्च अदालत न्ह्यःने न्ह्याः वनाः थुकथं निर्णय यानाबिउबलय् दक्कय् ला एमाले दुनेया माधव पक्षयात तःधंगु धक्का लात धाःसा माओवादीयात नं धक्का लात । तर माधव नेपालं अदालतप्रति छुं आग्रह तःगु खनेमदु, फैसलाया पुनरावलोकन यायेमाल धकाः वंगु नं मदु । तर प्रचण्ड थुगु फैसलाया पुनरावलोकन यायेमाल धकाः वन । तर तत्काल हे प्रधान न्यायाधीश चोलेन्द्र शम्शेर राणाया इजलासं पुनरावलोकन यायेम्वाःगु धकाः खारेज यानाबिल । थ्व हे खँया हिसाब किताब कायेत हे प्रचण्डं मौका मालाच्वंगु व गजेन्द्र हमालया सवालयात छ्यःगु धाइगु अनुमान जुयाच्वंगु दु । तर पिने घोषित रूपं धाःसा प्रचण्डं हमालया नियुक्तियात समर्थन याःगु हे खः ।

बार एसोसियनया वकिल जक मखु, सर्वोच्च अदालतया न्यायाधीशत हे चोलेन्द्र राजिनामा बिइमाः धाइगु पक्षय् हे दु । थुकिया हुनि धाइगु न्यायपालिकां कार्यपालिकाय् भाग फ्वन धाइगु सवाल जक मखु, अदालतय् जुयाच्वंगु चरम बेथिति नं खः । बारया पुलांम्ह नायः हरिकृष्ण कार्कीया रिपोर्ट कथं ध्यबा नयाः फैसला यायेगु ज्याय् वकिल जक मखु, स्वयं गुलिखे न्यायाधीशत हे बिचौलिया वा दलालया भूमिकाय् कुहाँ वःगु दु । गुलिसिनं ला ध्यबा नयाः नं अःखः फैसला यानाबिल धकाः नं धयाच्वंगु दु ।

अन्ततः प्रधानन्यायाधीश राणां थःपिसं राजीनामा बीमखु, फुगु या धकाः धायेधुंकूगु दु । थ्व अवस्थाय् प्रधान न्यायाधीशयात चीकेगु छगू जक उपाय धाइगु संसदय् महाअभियोग प्रस्ताव तयेगु हे खः । राष्ट्रिय सभाय् माओवादीया सांसद राम नारायण बिडारीं महाअभियोगया नितिं आधार तयार जुयाच्वंगु दु धकाः धाःसां मूलतः शेर बहादुर देउवां हे महाअभियोग तयेगु ज्या जुइमखु धकाः धायेधुंकूगु अवस्था दु । प्रधानमन्त्रीं सर्वोच्च अदालतया समस्या सर्वोच्च अदालतं हे समाधान याइ धकाः धाःगु मतलब हे संसदपाखें ल्हाः तयेगु ज्या जुइमखु धाःगु खः । मेखे प्रमुख विपक्षी दल एमालेया नायः केपी शर्मा ओलीं प्रधान न्यायाधीश राणां जक राजिनामा बीमाःगु छाय्? राजिनामा बिइगु खःसा परमादेश जारी याःपिं न्याम्ह हे न्यायाधीशतसें राजिनामा बीमाः धासें राणाया बचाउ याःगु दु । थथे जूगुलिं थ्व मुहिम दिनावनीगु हे आशंका अप्वया वनाच्वंगु दु । प्रन्या राणायात काँग्रेस व एमाले निथीसिया हे समर्थन दुगु खनेदुगु दु । थथे जूगुलिं यानाः राणायात नियुक्त यायेगु ज्याय् गथे ओली व देउवाया ल्हाः दुगु खः, इमिसं हे आः नं राणायात आशिर्वाद बियाच्वंगु खनेदु ।

थथे हे जुल धाःसा नेपालय् गुगु विकृति, विसंगति व बेथितिया राज जुयाच्वंगु दु, उकिया जरा ला राजनीति हे जूगु खनेदत । नापं स्वतन्त्र न्यायपालिका धकाः धाःसां प्रधान न्यायाधीश नियुक्ति संवैधानिक परिषद्ं याइगु व उकी प्रधानमन्त्री, सभामुख, राष्ट्रिय सभाया अध्यक्ष, विपक्षी दलया नेता च्वनीगु जुयाः राजनीतिक ख्यलं हे नियुक्त जुइगु खः । सभामुख धाःपिं नं दलं वइगु जुयाः दलया नेताया हे भूमिका जू वनी । थथे जुयाः देसय् विकृति पिकायेगु ला कि नियन्त्रण यायेगु धाइगु ल्हाः दुपिं हे नेतात खः । मेपिं ला इमिगु हे ल्हाःतुति जक खः ।

सम्बन्धित बुखँ

LEAVE YOUR COMMENTS