मरुसतःया मू थां धस्वाकल

येँ देय्या सम्पूर्ण द्यः व जनताया नामं संकल्प पुजायेँ (नेपालभाषा टाइम्स)÷ ऐतिहासिक मरुसतः पुनर्निर्माणया झ्वलय् म्हिगः दकलय् महत्वपूर्ण ज्याकथं सतःया प्यंगः मू थां धस्वाकेगु ज्या जुल । मरुसतःया मू अंग जूगुलिं थ्व थां धस्वाकेगु ज्या म्हिगः छगू सांस्कृतिक उत्सवया रूपय् जूगु खः ।

मरुसतःया सिँ सम्बन्धी ज्या जुयाच्वंगु कालभैरव लागाय् तान्त्रिक व वैदिक विधि कथं संकल्प पुजा यासें येँ मनपाया मेयर विद्यासुन्दर शाक्य, उपमेयर हरिप्रभा खड्गी श्रेष्ठ व काष्ठमण्डप पुनर्निर्माण समितिया नायः लिसें प्रदेश ३ या सांसद राजेश शाक्यपिंसं फुक्कं थां सिँ सम्बन्धी ज्या याना च्वनादीम्ह मू नायः लक्ष्मीभक्त राजचलायात लःल्हानादीगु खः ।

वयां लिपा मू थां क्वबियाः मरुसतः तक यंकेगु ज्या जूगु खः । मू थां धस्वाकेगु उगु ज्याय् येँ महानगरया सम्पूर्ण जनताया सहभागिता जुइमा धकाः प्रतिनिधिया रुपय् ६३ गू त्वाःया ज्यापु नायःपिं, १८ गू बहाः, १८ गू बहीया चक्रेश्वरपिं लिसें फुक्कं जातीय पुचःया नायःपिनि उपस्थिति दुगु खः । लिसें येँ देय्या जीवित देवी कुमारी (आसन जक), मखं कुमारी, गणेश व भैरव लगायत पञ्चबुद्धयात नं अन बिज्याकूगु खः ।

ज्याझ्वलय् येँया थीथी सांसद लिसें थीथी वडाया वडाध्यक्ष व भाषा, धर्म, जाति ख्यःया हनेबहःपिं न्ह्यलुवापिनि नं उपस्थिति दुगु खः । मू थांया संकल्प पुजा जूबलय् नेवाः परम्परा कथं सहभागीपिं सकसिनं कीगः तीगु ज्या नं जूगु खः ।मरु सतलय् तयेमाःगु प्यंगः थां मध्ये स्वंगः न्हूगु दयेकूगु खःसा छगः पुलांगु हे छ्यःगु खः ।

पुलांगु थां वैज्ञानिक परीक्षण लिपा छ्यःसां जिउ धइगु प्रमाणित जुइवं उकियात नं छ्यलेगु निर्णय समितिं याःगु खः । अन तये माःगु प्यंगः थां मरु, तःब्व भिंद्यःत्वाः, ओमबहाः व मखंत्वाःयापिंसं क्वबियाः यंकूगु खः । मरुसतः येँ मनपाया प्यंगू वडा (१९, २०, २३ व २४) दुने लाःगु जुयाः प्यंगुलिं वडाया प्रतिनिधिया रुपय् थ्व प्यंगू त्वालं ल्ह्वनेगु ज्या जूगु खः ।

थां क्वबियाः यंकूगु इलय् नाय्खिं, धाः, धिमे, बाँसुरी व दाफा बाजं थानाः यंकूगु खः । पुनर्निर्माण समितिया नायः शाक्यं कनादीकथं थ्व थां धस्वाके धुनेवं आः मरु सतःया न्हापांगु तँ थनेगु ज्या न्ह्याइ । थ्वहे वइगु असार मसान्त तक मरुसतःया न्हापांगु तँ दने सिधयेकेगु ताः तयातःगु दु ।