ने. सं. ११४६ तछलागा त्रयोदशी -

राणाया ससःदाजु नं मन्त्री

प्रधानमन्त्री शेरबहादुर देउवां मन्त्रिमण्डलयात पूर्णता बियादीगुया नापनापं थुकिया कडा आलोचना नं शुरु जूगु दु । खास यानाः प्रतिनिधिसभा पुनस्र्थापनाया फैसला याःगुया ‘सिरपाः’ स्वरुप सर्वोच्च अदालतया प्रधानन्यायाधीश चोलेन्द्र शम्शेर जबराया ससःदाजु (तःधीम्ह कलाःपाखें) गजेन्द्रबहादुर हमालयात नं मन्त्री दयेकूगु खँयात कयाः सरकारया आलोचना जुयाच्वंगु दु ।

हमालयात मन्त्री दयेकेगु लागिं राणां ताःई न्ह्यवंनिसें सरकारयात दबाब बियाच्वंगु खँ लिपांगु इलय् चर्चाय् वःगु खः । नेपालगञ्जय् च्वंम्ह हमाल छगू इलय् कांग्रेस राजनीतिइ लगे जूम्ह खःसां अन वडा अध्यक्ष चुनाव त्याकातःम्ह खः । आः राजनीति त्वःताः स्वतन्त्र जीवन हनाच्वंम्ह हमालयात सरकारय् हयेमाःगु छुं हे कारण खने मदु । वय्कःयात राणाया ‘कोटां’ हे मन्त्री दयेकूगु खँ सार्वजनिक जुयाच्वंगु दु ।