येँमपां महानगरीय प्रहरीयात थप ध्यबा बीगु

येँ – येँ महानगरपालिकां सुरक्षास्थितियात अझ सशक्त यायेगु ल्याखं महानगरीय प्रहरी परिसरयात खुगू करोड तका ग्वाहालि याइगु जूगु दु । येँ मनपां सुरक्षास्थितियात कडा यायेगु निंतिं सीसीटिभी क्यामरा जडान यायेत थप निगू करोड चय्छगू लाख तका उपलब्ध याकेत्यंगु खः ।

येँ मनपा व प्रहरी परिसर दथुइ महानगर लागा दुने सुव्यवस्थापन, शान्ति सुरक्षा, अपराध नियन्त्रण, दुर्घटना न्यूनीकरण, फोहर व्यवस्थापन, फुटपाथ नियन्त्रण, प्रदूषण न्यूनीकरणया निंतिं आवश्यक जुइगु सीसीटिभी क्यामरा जडान यायेत उगु ग्वाहालि बीत्यंगु खः ।
येँ मनपाया ३३ क्वःगु कार्यपालिकायाया बैठकं महानगरीय प्रहरी परिसर, येँयात उगु ध्यबा बीगु निर्णय याःगु खः ।

येँ महानगरपालिकां महानगरया सुरक्षायात ध्यानय् तयाः थ्व स्वयां न्ह्यः नं परिसरयात वंगु फागुन १५ गते स्वंगू करोड तका दां उपलब्ध याकूगु खः । येँ मनपा व प्रहरी परिसर दथुइ थगुने असोज महिनाय् समुदाय–प्रहरी साझेदारी अवधारणा कार्यान्वयन यायेत जूगु सहमतिकथं उगु ग्वाहालि उपलब्ध याकूगु येँ मनपाया प्रवक्ता ईश्वरमान डंगोलं जानकारी बियादिल ।

थ्व हे झ्वलय् येँ मनपाया कार्यपालिकाया उगु बैठकं सहरी योजना आयोगया उपाध्यक्षय् सरोज बस्नेतयात नियुक्त याःगु दु । बस्नेत थ्व स्वयां न्ह्यः आयोगया सदस्य सचिव जुया च्वनादीम्ह खः । वंगु चैत २४ गते जूगु महानगरया प्यक्वःगु नगरसभां स्वीकृत याःगु येँ मनपा सहरी योजना आयोग ऐन २०७५ या व्यवस्थाकथं बस्नेतयात उपाध्यक्षय् नियुक्त यानागु प्रवक्ता डंगोलं कनादिल ।

येँ मनपाया प्रमुख आयोगया अध्यक्ष जुइगु व्यवस्था ऐनय् यानातःगु दु । बैठकय् येँ मनपा प्रमुख विद्यासुन्दर शाक्यं वडाया योजना कार्यान्वयन यायेबलय् महानगरलिसे समन्वय यायेत वडाअध्यक्ष व कार्यपालिकाया दुजःपिंत इनाप यानादीगु दु । थुकथं हे उगु बैठकं येँ महानगरपालिका व पाकिस्तानया इस्लामावाद सहरलिसे भगिनी सम्बन्ध स्थापना यायेगु प्रस्तावयात नं अनुमोदन याःगु दु ।

सम्बन्धित बुखँ

LEAVE YOUR COMMENTS