लक्ष्मीदासया नामं प्रतिष्ठान गठन याइगु
येँ (नेपालभाषा टाइम्स)- भाषासेवी लिसें नांजाःम्ह उद्योगपति लक्ष्मीदास मानन्धरया नामं ‘लक्ष्मीदास प्रतिष्ठान’ गठन याइगु जूगु दु । वय्कःया बारे च्वयातःगु जीवनी सपूm ‘परिवर्तनका संवाहक लक्ष्मीदास’ नांगु सफू विमोचन ज्याझ्वलय् न्ववासें प्रा.डा. त्रिरत्न मानन्धरं थुकिया जानकारी बियादीगु खः ।
ज्याझ्वलय् पुलांम्ह प्रधानमन्त्री माधव नेपालं उगु सफू विमोचन यानादीगु खः । ज्याझ्वलय् न्ववासें भाजु नेपालं लक्ष्मीदास मानन्धर नेपाःया उद्योग वाणिज्य, राजनीति, समाजसेवाया ख्यलय् आपालं ज्या यानादीगु खँ कनादिल । वय्कलं येँयाम्ह खःसां येँनं पने नं आपालं थासय् वय्कलं ज्या यानादीगु खँ नं वय्कलं कनादिल ।
अथे हे ज्याझ्वलय् न्ववासें नेवाः न्ह्यलुवा मल्ल के. सुन्दरं लक्ष्मीदास मानन्धर बांलाःगु स्वां ह्वयाच्वंगु गमला जक मखु बरु आपालं स्वां ह्वयाच्वंगु क्यब हे खः धासें वय्कःया बहुप्रतिभाया चर्चा यानादिल ।
जनकवि दुर्गालाल श्रेष्ठया सभापतित्वय् जूगु उगु ज्याझ्वलय् कवि श्रेष्ठं लक्ष्मीदासया बारे कविता पाठ नं यानादीगु खःसा लक्ष्मीदास मानन्धरया काय नारायणदास मानन्धरं लसकुस यानादीगु खः ।
वय्कःया कायपिं देवदास मानन्धर व नारायणदास मानन्धरं पिथनादीगु उगु सफू लक्ष्मण अधिकारी व शुभेच्छा विन्दु तुलाधरं च्वयादीगु खः । सफुतिइ भाजु मानन्धरया जीवनया समग्र पक्षया बारे विस्तृत रुपं वर्णन यानातःगु दु ।
LEAVE YOUR COMMENTS