शंखधर दिवसय् र्याली (किपा स्वयादिसँ)

येँ – शंखधर दिवस छगू भिंतुना र्यालीसहित आइतवाः तःजिक हंगु दु । येँया बसन्तपुली सुरु जूगु भिंतुना र्याली न्ह्यः उपप्रधानमन्त्री व रक्षा मन्त्री इश्वर पाखरेलं शंखधरया मूर्तिइ स्वांमाः क्वखायेकुसें शुभारम्भ यानादीगु खः । र्याली सुरु यानादिसें वय्कलं नेपाल संवत् छगू सीमित थासय् जक लिकुनाच्वंगु धासें आः थुकियात नेपाःयंकं न्यंका यंकेगु तःधंगु हाथ्या दुगु खँ धयादिल ।

वय्कलं नेपाल संवत् देय्य सुदूर पश्चिम निसें देय्या कुंकुलामय् तक थ्यंकेगु निंतिं नेपाः सरकारपाखें यायेमाःगु ग्वाहालि यायेत तयार दुगु खँ नं धयादिल । थ्व झ्वलय् नेपाल संवत् आन्दोलनया प्रणेता पद्मरत्न तुलाधर मदुगु खँ लुमंकुसें वय्कलं तुलाधरया निधनं भाषिक, जनजाति व मानव अधिकार आन्दोलनय् तःधंगु क्षति जूगु खँ धयादिल ।

सांसदपिं कृष्णगोपाल श्रेष्ठ, जीवनराम श्रेष्ठ, प्रदेश सांसद राजेश शाक्य, बसन्त मानन्धर निसें स्थानीय जनप्रतिनिधिपिनि उपस्थितिइ जूगु भिंतुना र्याली बसन्तपु महाद्यः पार्वती देगलं न्ह्यानाः प्याफः, त्यंगः, थाय्मदु, असं, वंघः, न्हूसतक, ओमबहाः, लगं, ह्युमत, क्वहिति, भिंद्यःत्वाः, परोपकार जुयाः लखुतिर्थय् थ्यंकःवंगु खः । लखुतिर्थय् न्हूदँ समारोह समितिया पुलांम्ह नायः डा. चुन्दा वज्राचार्यया सभापतित्वय् भिंतुना सभा जूगु खः । ज्याझ्वलय् वइगु कछलागा पारु (मंसिर ८ गते) शनिवाः येँया थँहितिइ सफू ब्वज्या व साँस्कृतिक ब्वज्या जुइगु लिसें कछलागा नवमी (मंसिर १५ गते) शनिवाः देय् भ्वय् छेँय् तुच्चा ज्याझ्वः जुइगु जानकारी नं बिउगु खः ।

सम्बन्धित बुखँ

LEAVE YOUR COMMENTS