न्यूयोर्कय् न्हूदँया भिंतुना र्याली
येँ(नेपालभाषा टाइम्स)- अमेरिकाया न्यूयोर्कय् नेपाल संवत् ११४५ न्हूदँया लसताय् भिंतुना र्याली पिथंगु दु । नेवाः गुथि न्यूयोर्क व नेवाः नखः न्यूयोर्कया मंकाः ग्वसालय् नेपाल संवत् ११४५ न्हूदँया भिंतुना र्याली पिथंगु खः ।
नेपाल संवत् ११४५ कछलाथ्व पारु, म्हपुजा (नोभेम्बर २) शनिवाः कुन्हु न्यूयोर्कया ज्याक्सन हाइटय् च्वजंगु डाइभर्सिटी प्लाजां भिंतुना ¥याली पिथंगु खः । नेवाः गुथि न्यूयोर्कया नायः विजयमान सिंहं लसकुस यानादीगु खः । उगु इलय् ¥यालीइ ब्वति कयादीपिं सकसितं सिन्हः तिकाः ह्याउँगु क्वखा बियाः लसकुस यासें भिंतुना कालबिल नं याःगु खः ।
नायः सिंहं लसकुस यानादिसें नेपाल संवत्या महत्व व औचित्ययात कयाः कनादीगु ज्याझ्वलय् गुथिया दुजः राजेन्द्र महर्जनं ‘न्हूदँया भिंतुना’ र्याली व र्यालीइ थ्वयेकेगु नाराया बारे जानकारी बियादीगु खः ।
अथे हे नेवाः नखः न्यूयोर्कया नायः नरेशमान शाक्यं ¥यालीइ ब्वति कयादीपिंत सुभाय् देछासे नेपाल संवत्या छ्यलाबुला गुकथं जुल धइगु ऐतिहासिक पक्षयात कयाः जानकारी बियाीगु खः । लिसें वय्कलं न्हूदँ हनेगु व भिंतुना ¥यालीइ ब्वति कायेगु जक मखसे नेपाल संवत्या महत्व न्हू पुस्ताया दथुइ नं प्रचार याना वनेमाःगु खँय् बः बियादीगु खः ।
नेवाः नखः न्यूयोर्कया पुलांम्ह नायः लिसें सल्लाहकार विष्णुमान प्रधानं दँय्दसं निगू संस्थाया मंकाः ग्वसालय् नेपाल संवत् न्हूदँया लसताय् भिंतुना र्याली व भिंतुना कालबिल ज्याझ्वः याना वयाच्वनागु जानकारी बियादीगु खः ।
नेपाल संवत्या प्रवर्तक राष्ट्रिय विभूति शंखधर साख्वाःया किपा, न्हूदँया भिंतुना च्वयातःगु ब्यानरलिसें न्ह्याःगु ¥यालीइ न्यूयोर्क व उकिया जःखः च्वंपिं सलंसःया ल्याखय् नेपाःमिया सहभागिता दुगु खः ।
ज्याझ्वलय् नेवाः नखः न्यूयोर्कया मूछ्याञ्जे तुल्सीनारायण चित्रकार, नेपाल जनजाति महासंघ अमेरिकाया दांभरिं कृष्णा महर्जन लगायतं नेपाल संवत्या महत्व व थुकिया थीथी पक्षयात कयाः नुगःखँ तयादीगु खः ।
लुमंकेबहजू नेपाल संवत् न्हूदँया लसताय् थीथी देशय् च्वनाच्वंपिं नेवाःतय् खलः, पुचः, गुथिपाखें दँय्दसं कछलाथ्व पारुकुन्हु भिंतुना ¥याली पिथनेगु व वकुन्हु हे बहनि मंकाः म्हपुजा यायेगु याना वयाच्वंगु दु ।
LEAVE YOUR COMMENTS