प्रदेश नं. ३ या राजधानी व नामय् छक्वलं मतदात

येँ – प्रदेश नं. ३ या राजधानी व नांया बारे छक्वलं मतदान जुइगु खँ धाःगु दु । प्रदेश नंं ३या नांयात कयाः प्रदेश सभाय् स्वंगू नां दर्ता जुइधुंकूगु दु । आःतक नेपालमण्डल, गौरीशंकर व नेवाः–ताम्सालिङ नां दर्ता जुयाच्वंगु दुसा मेगु छगू नां नं दर्ता जुइत्यंगु खँ धाःगु दु ।

प्रदेश सभाय् याकनं हे ‘बागमति’ नां दर्ता यायेगु तयारी जुयाच्वंगु खँ सीदुगु दु । थ्व नां नेपाल कम्युनिष्ट पार्टी (नेकपा) या लाइन कथं दर्ता जुइत्यंगु खः । अथे खःसां प्रदेशया नां ‘नेपालमण्डल’ तयेगु बारे नं ब्यापक सहलह जुयाच्वंगु खँ धाःगु दु । ‘नेपालमण्डल’यात कयाः आपालं सांसदतय् समर्थन अप्वया वनाच्वंगु खँ प्रदेश सभाया छम्ह सांसदं धाःगु दु ।

प्रदेशया राजधानी व नां तयेत राजनीतिक वार्गेनिङ जुइफइगु सम्भावना दुगु खँ वय्कलं धयादीगु दु । थ्वहे झ्वलय् प्रदेशया नां ‘नेपालमण्डल’ व ‘नेवाः ताम्सालिङ’ दर्ता याःपिनि दथुइ सहलह यायेगु तयारी जुयाच्वंगु दु । निगू पुचःया दथुइ सहलह जुल धाःसा दकलय् न्हापांगु प्राथमिकता ‘नेपालमण्डल’यात बीगु बारे नं सहलह जुइ ।

यदि बहुमतं उकियात स्वीकार मयात धाःसा जक ‘नेवाः ताम्सालिङ’ नां न्ह्यःने यंकीगु खँ धाःगु दु । ‘नेपालमण्डल’ तयेमाः धकाः नां दर्ता याकूगु प्रदेश सांसद अजयक्रान्ति शाक्य सहितया पुचलं ‘नेपालमण्डल’ तयेमाःगुया ऐतिहासिक कारण सहित उकिया व्याख्या नं यानातःगुलिं यानाः प्रदेशया नां ‘नेपालमण्डल’ जुइगु सम्भावना अप्वः दुगु खँ सांसदतय्सं धयाच्वंगु दु ।

प्रदेशया नांयात प्रदेश सभाय् थीथी नां दर्ता जुयाच्वंसां मतदान याकेगु निंतिं माःगु कार्यविधि धाःसा दयेकेगु ज्या अझं मजूनि । मेखे प्रदेश राजधानी काभ्रेय् तयेगु बारे नं सांसदतय् दथुइ बिस्कं सहलह जुयाच्वंगु दु ।

मुख्यमन्त्री डोरमणि पौडेलं हेटौंडाय् हे प्रदेशया राजधानी तयेमाः धकाः पार्टीया निम्ह अध्यक्षयात लबिङ यानाच्वंगु दुसा आपालं सांसदत धाःसा हेटौंडाय् राजधानी तयेबलय् ८८ म्ह सांसदयात अपाय्क जुइ धासें काभ्रेय् राजधानी तयेमाःगु अडान कयाच्वंगु दु ।

इञ्चार्ज ल्ययेगु मापदण्डय् नं विवाद
येँ – नेकपाय् जिल्ला इञ्चार्ज व सहइञ्चार्ज ल्ययेगु मापदण्डय् विवाद पिहांवःगुु दु । नेकपाया मंगलवा च्वंगु सचिवालय बैठकय् जिल्ला इञ्चार्ज व सहइञ्चार्ज ल्ययेगु मापदण्डया बारे सहलह जूगु खः । तर सहमति जुइ मफयेवं बैठक हे स्थगित जूगु खः ।

मन्त्री, सांसद, प्रदेशसभा दुजः जूपिंत इञ्चार्ज व सहइञ्चार्ज दयेकेगु कि मदयेकेगु धइगु बारे विवाद जूगु खः । प्रधानमन्त्री लिसें पार्टी अध्यक्ष केपी शर्मा ओली धाःसा मन्त्री, सांसद, प्रदेशसभा दुजःयात नं इञ्चार्ज व सहइञ्चार्ज दयेकेगु पक्षय् दुसा मेम्ह अध्यक्ष पुष्पकमल दाहाल पक्ष धाःसा दयेके मजिउ धयागु पक्षय् दुगुलिं सहमति जुइ मफुगु खः । सचिवालयया बैठकय् प्रम ओली अल्पमतय् दुसा दाहाल बहुमतय् दु ।