अफगानिस्तान शृङ्खलाबद्ध बम विस्फोट

एजेन्सी – अफगानिस्तानया राजधानी काबुलया छगू व्यस्त बजारय् म्हिगः सुथय् जूगु शृङ्खलाबद्ध बम विस्फोटय् लानाः म्होतिं नं निम्हेसिया ज्यान वंगु दु। काबुल प्रहरीया गाडीयात लक्षित यानाः थ्व विस्फोट याःगु खँ प्रहरीं धाःगु दु। प्रहरी प्रवक्त फरदाज फरामार्जं न्हापां जूगु विस्फोटय् निम्ह सीगु व निम्ह घाःपाः जूगु व मेगु गाडीइ लक्षित यानाः जूगु विस्फोटय् मेपिं निम्ह घाःपाः जूगु खँ धाःगु दु। अथेहे स्वंगूगु विस्फोटय् धाःसा छुं क्षति मजूगु खँ वय्कलं कनादीगु दु ।

काबुलय् छुं ई न्ह्यवनिसें सरकारी कर्मचारी, पत्रकार, वकिल, अधिकारकर्मी व सवारी साधनयात लक्षित यानाः न्ह्याबलें धयाथें बम आक्रमण जुइगु जुयाच्वंगु दु। तर थुकिया जिम्मेवारी धाःसा सुनां नं कयाच्वंगु मदु। सरकारं धाःसा थ्व विस्फोटय् नं विद्रोही पुचः तालिवानया हे ल्हाः दुगु द्वपं बियाच्वंगु दु। तालिवान धाःसा थौंकन्हय् शान्ति प्रक्रियाया निंतिं सरकार लिसे वार्ता यानाच्वंगु दु। कतारया दोहाय् जुयाच्वंगु थ्व वार्ताया प्रगति धाःसा तसकं सुस्त जुयाच्वंगु दु ।