थुगुसी नेपालभाषा साहित्य तःमुँज्या भार्वाचोय्

ख्वप (नेपालभाषा टाइम्स)- दँय्दसं मोहनिया इलय् जुया वयाच्वंगु नेपालभाषा साहित्य तःमुँज्या थुगुसी भार्वाचोय् जुइगु जूगु दु । थुगुसी जुइगु पीनिक्वःगु नेपालभाषा साहित्य तःमुँज्या ख्वप नगरपालिका वडा नं. १ या भार्वाचोय् यायेगु क्वःछिउगु खः ।

वइगु कौलाथ्व द्वादशि व त्रयोदशि (असोज २१ व २२) निन्हुयंकं तःमुँज्या जुइगु जूगु दु । भार्वाचोया मिनिबस पार्कय् जुइगु निन्हुयंकंया नेपालभाषा साहित्य तःमुँज्या ताःलाकेत १ वडाअध्यक्ष श्यामकृष्ण खत्रीया संयोजकत्वय् पीनिम्ह दुजः दुथ्याःगु पीनिक्वःगु नेपालभाषा साहित्य तःमुँज्या ग्वसाः खलः नं नीस्वंगु दु ।

नेपालभाषा साहित्य तःमुँज्याया नायः आशाकुमार चिकंबंजारया सभापतित्वय् च्वंगु मुँज्यां थुगुसीया तःमुँज्या भार्वाचोय् यायेगु क्वःछिउगु खः । थ्व स्वयां न्ह्यःन नं उगु थासय् तःमुँज्या यायेधुंकूगु दु । थ्वयां न्ह्यः जूगु तःमुँज्याय् वरिष्ठ समालोचक लिसें राजनीतिक चिन्तक प्रा. माणिकलाल श्रेष्ठयात हनेज्या याःगु खः ।

मुँज्याय् नवासें नेपाल मजदुर किसान पार्टीया सचिव पे्रम सुवालं नेपालभाषा साहित्य तःमुँज्या ज्या यानाः नइपिं वर्गया खः धासें तःमुँज्यां जनसरोकार दुगु राष्ट्रिय अन्तर्राष्ट्रिय विषय उत्थान याना वयाच्वंगु खँ कनादिल ।

नेमकिपाया केन्द्रीय दुजःलिसें बागमति प्रदेश सांसद सरोजराज गोसाइँ तःमुँज्यां देय्न्यंकंया भाषा, संस्कृति व साहित्यपे्रमीतय्त छगू थासय् हयेगु ज्या यानाच्वंगु दु धयादिल । नेमकिपा ख्वप नगर कमिटीया अध्यक्ष नारायणबहादुर सुवालं नेपालभाषा साहित्य तःमुँज्या राजनीतिक संघर्षया दबू जूगु विचाः तयादीगु खः ।