न्वचु कला तालिम क्वचाल
येँ(नेपालभाषा टाइम्स)- ग्वाहालि पुचः नेपाः १७ वडाया ग्वसालय् जूगु नीन्हुयंकंया न्वचु कला व क्षमता अभिवृद्धि तालिम क्वचाःगु दु । तालिम समापन ज्याझ्वलय् मूपाहांकथं झायादीम्ह नेवाः न्ह्यलुवा डा. महेशमान श्रेष्ठं प्रशिक्षार्थीतय्त दसिपौ लःल्हानादीगु खः ।
ज्याझ्वलय् वय्कलं लिपांगु इलय् चर्चाय् वयाच्वंगु नक्कलि भुटानी शरणार्थी प्रकरणं नेपाःयात अन्तर्राष्ट्रिय ख्यलय् हे बेइज्जत यायेगु ज्या जूगु दु धासें नेपाःया राजनीतिइ शुद्धिकरणया आवश्यकता दुगु खँय् बः बियादिल । ज्याझ्वलय् विशेष पाहांकथं झायादीम्ह येँ महानगरपालिका १७ वडाअध्यक्ष नविन मानन्धरं नेवाःतय्सं आः नं राज्यनाप स्वापू तयेगु ज्या मयात धाःसा कन्हय् दिनय् नेवाःत धइपिं मात्त माले मालीगु अवस्था वइगु जक मखसे लुइके तकं थाकुइगु स्थिति वइ धासें आः नेवाःतय्सं राज्यसत्ता, राजनीतिक व कर्मचारी प्रशासनया ख्यलय् दुहां वनेगुपाखे ध्यान बी माः धयादिल ।
वय्कलं आः नेवाःत नं कर्मचारी प्रशासनया सहसचिव, सचिव थेंज्याःगु तह तक थ्यंकेमाःगु अवस्था वःगु दु धासें उखेपाखेया लँपुइ ध्यान बीमाःगु आवश्यक दुगु खँय् बः बियादिल । लिसें वय्कलं अभिभावकपिंसं थौंकन्हय् थः मस्ततय्त अमेरिका, अष्ट्रेलिया जापान थें ज्याःगु पश्चिमा व युरोपेली देशय् छ्वयेगु यानाच्वंगु व उकी हे लय्तायेगु यानाच्वंगुलिइ आः झीसं थः मस्तय्त सिंहदरवार छ्वयेगुपाखे ध्यान बीमाःगु व उकिया निंतिं कुतः यायेमाः धयादिल ।
वय्कलं थः मस्तय्त सिंहदरवार, मन्त्रालय, येँ महानगरपालिका थेंज्याःगु थासय् छ्वयेगुपाखे विचाः यायेगु कि मयायेगु धइगु न्ह्यसः तयादिसें थज्याःगु थासय् नं थौंया इलय् प्रशस्त मात्राय् तलब नयेत गाः धयादिल । पुचःया नायः विभूति मानन्धरया सभापतित्वय् न्ह्याःगु ज्याझ्वलय् प्रशिक्षार्थीपिं रिता मघैया, चेतना श्रेष्ठ व सुशील मानन्धरं तालिमया अनुभव कनादीगु खः ।
प्रशिक्षण संचारकःमि केके मानन्धरं बियादीगु खः ।
LEAVE YOUR COMMENTS