विराटं जगतसुन्दरया बुन्हि हन

ख्वप – विराट नेपालभाषा साहित्य सम्मेलन गुथिं नेपालभाषाया प्यंगः थांमध्ये छगः मास्तर जगतसुन्दर मल्लया १३७ क्वःगु बुन्हि हन । थनया खौमा त्वालय् पलिस्था यानातःगु मल्लया झ्वाताय् स्वां देछासे बुन्हि हंगु खः । गुथिया नायः महेन्द्रगोपाल कर्माचार्यं लसकुस यासें जगतसुन्दर मल्लं शिक्षा मदयेकं सांसारिक सुख जक मखु, छुं नं कथंया सुख प्राप्त याये फइमखु धासें दकलय् न्हापां मांभासं अंगे्रजी ब्वनेगु स्कुल चायेकूगु खँ कनादिल ।

नेपाल साहित्य मन्दिरया नायः तिलकप्रकाश कायस्थं जगतसुन्दर मल्ल खौमा त्वालय् हे जन्म जुयाः ब्वलंम्ह खःसां नं व्यक्तिगत समस्याया कारणं लिपा येँय् वनाः च्वं वंगु खँ कनादिल । येँय् च्वनेगु याःसां नं ख्वपय् थ्यंक वयाः आखः ब्वंकेगु व शिक्षा दीक्षा बीगु निंतिं न्हियान्हिथं सल गयाः वइगु नं वय्कलं कनादिल ।

ओमचरण अमात्य, प्रदीपरत्न शाक्यं नं थःथःगु नुगःखँ प्वंकादीगु उगु ज्याझ्वलय् नेवाः न्ह्यलुवा नगेन्द्र हाडा, त्रिरत्न शाक्य, नेवाः देय् दबूया मूछ्याञ्जे माइलाबाबु द्यःला, साहित्यकारपिं ध्रुव मधिकःमि, डा. योगेन्द्र प्रधान, सौरभ शाक्य, कृष्णभक्त बोडे लगायत आपालं भाषाह्यमि, साहित्यकार, पत्रकारतय् उपस्थिति दुगु खः ।