मधेश आन्दोलनया प्रतिवेदन सार्वजनिक यायेत माग

येँ – राष्ट्रिय जनता पार्टी नेपाल (राजपा) या सांसदतय्सं तराई–मधेशय् जूगु आन्दोलनया छानविन यायेत सर्वोच्च अदालतया पुलांम्ह न्यायाधीश गिरीशचन्द लालया अध्यक्षताय् नीस्वंगु छानविन आयोगया प्रतिवेदन सार्वजनिक यायेत माग यासें म्हिगः नं संसदया बैठक अवरोध याःगु दु ।

संसदय् न्ववायेगु झ्वलय् राजपाया सांसद अनिलकुमार झां सभामुखं सरकारयात लाल आयोगया प्रतिवेदन सार्वजनिक यायेत रुलिङ यायेधुंकाः नं सरकारं प्रतिवेदन सार्वजनिक यायेत मस्वःगु धासें प्रतिवेदन सार्वजनिक मजूतले संसदया बैठक न्ह्याके बीमखु धयादिल ।

सभामुखपाखें रुलिङ जूगु छवाः स्वयां अप्वः ई बीधुंकूगु व प्रतिवेदन सार्वजनिक जुल धाःसा कैलालीया टीकापुरय् जूगु घटनाय् सुनां गज्याःगु गल्ती अन्याय यात, सुसुयात कारबाही सिफारिस याःगु दु धइगु सीके फइगु धासें झां सरकारं प्रतिवेदन सुचुकेत स्वःगु धासें सभामुखया रुलिङयात सरकारं माने मयाइगु धइगु संसदीय सर्वोच्चयात माने मयाःगु खः धयादिल ।

थ्व स्वयां न्ह्यः नं राजपां प्रतिवेदन सार्वजनिक यायेमाःगु माग यासें संसद अवरुद्ध याना वयाच्वंगु खः । मेखे आयोगया अध्यक्ष लालं नं प्रतिवेदन सार्वजनिक याःसा देय् व जनताया निंतिं हित जुइ धासें प्रतिवेदन सार्वजनक याःसा बांलाः धायेगु याना वयाच्वंगु दु ।