दक्षिण कोरियाय् खिचाया ला प्रतिबन्ध तयेगु तयारी

एजेन्सी- दक्षिण कोरियाया राष्ट्रपति मून जे इनं खिचाया लाय् प्रतिबन्ध तयेगु बारे सल्हा यानादीगु दु । प्रधानमन्त्री लिसे नापलायेगु झ्वलय् राष्ट्रपति मूनं खिचाया ला प्रतिबन्ध तयेग बारे बिचाः यायेगु ई वल ला धकाः न्ह्यसः तयादीगु खः ।

दक्षिण कोरिया खिचाया ला नइगु देय् कथं म्हसीका दुगु देय् खः । अथे खःसां थनया यक्वस्यां गुबलें खिचाया ला नःगु मदु । तर दँय् १०लाख म्ह खिचा लाया निंतिं हे स्यायेगु जुयाच्वंगु दु ।
दक्षिण कोरियाय् खिचा व भौचित क्रूरढंगं स्यायेमदुगु कानून दु, तर ला नयेत धाःसा प्रतिबन्ध मदु । खिचाया ला नइगु देय् धाःसां छगू सर्वेक्षणय् थनया ८४ प्रतिशतं गुबलें नं खिचाया ला मनयागु व लिपा नं मनयेगु धाःगु दु । उगु सर्वेक्षणय् ५९ प्रतिशत कोरियालीत खिचाया लाय् प्रतिबन्ध तयेमाः धयागु पक्षय् दु ।

खिचायात माया याइम्ह राष्ट्रपति मूनया खिचाया लाय् प्रतिबन्ध तयेफइगु धापूयात अनया पशु अधिकारवादी संस्थातय्सं लसकुस याःगु दु । वइगु दँय् दक्षिण कोरियाय् जुइगु राष्ट्रपतिया निर्वाचनया इलय् थ्व मुद्दा चर्चा वइगु अनुमान जुयाच्वंगु दु । राष्ट्रपतिइ उम्मेदवारी बीत तयार जुयाच्वंपिंसं खिचाया ला प्रतिबन्ध तयेमाः धकाः धायेगु यानाच्वंगु दु ।

सम्बन्धित बुखँ

LEAVE YOUR COMMENTS