विमान ल्याण्डिङ समस्या – बचे जूसा नापलाये, बचे मजूसा थुलि हे ..
‘जि च्वना वयागु प्लेन ल्याण्ड याये मफयाच्वन । आः शायद जिगु अन्तिम मेसेज थ्वहे जुइगु जुइ । बचे जूसा नापलाये, बचे मजूसा थुलि हे …।’
म्हिगः बुद्ध एअरया विमान येँय् वनाः फोर्स ल्याण्डिङ याये मालीगु जुइवं उकी च्वना वःपिं यात्रुत मध्ये छम्हेस्यां छेँय् थज्याःगु मेसेज समेत छ्वयेधुंकूगु जुयाच्वन । विराटनगरय् निघौ तक ल्याण्डिङया कुतः यानां नं सफल मजुसेंलि उगु विमान येँय् हयाः फोर्स ल्याण्डिङ याये माःगु खः । विमान ल्याण्डिङ याये मफयाः छखे पाइलटत वाथावाथा कनाच्वंगु खःसा मेखे यात्रुतय् दथुइ रुवावासी शुरु जुइधुंकूगु खः ।
विमान ल्याण्ड याये मफयाच्वन धायेवं गुलिं यात्रुतय्सं विमानया लुखा चायेका बिउ, जिपिं थनं हे तिंन्हुया वने धकाः तकं इनाप याःगु जुयाच्वन । अज्याःगु इलय् नं एअर होस्टेजतय्सं धाःसा ‘चिन्ता कयादी मते, जिमिसं छिकपिंत न्ह्याथे यानाः नं सुरक्षितपूर्वक ल्याण्ड याना बी’ धकाः हःपाः बियाच्वंगु खँ छम्ह यात्रुं कनादिल ।
वय्कलं कनादी कथं एअर होस्टेजतय्सं आः विमानय् च्वंगु चिकं फुक्क फुका छ्वयेगु लागिं पाइलटं कुतः यानाच्वंगु दु ताकि फोर्स ल्याण्डिङ यायेबलय् विमानय् मि मच्यायेमा । वयां लिपा विमानयात लःया रनवे धकाः उकिया द्यःने ल्याण्डिङ यायेगु जुइ’ धकाः नं याुत्रतय्त हःपाः बिउगु खः ।
तर एअर होस्टेजतय्सं अथे धाःसां उपिं नं अनिश्चित जीवनया कल्पना यासें सुकुंसुकुं ख्वयाच्वंगु खः । विमान फोर्स ल्याण्डिङ यायेबलय् छुं नं जुइफु धायेवं उकी च्वनावःपिं निम्ह यात्रु बेहोस जूगु खँ नं यात्रुतय्सं धाःगु दु ।
विमानय् ७२ म्ह यात्रु दुगु खः । यात्रुतय्सं फोर्स ल्याण्डिङया बारे बांलाक मसिउ । तर त्रिभुवन विमानस्थलय् दमकल, सेना, प्रहरी टन्न तयातःगु खनेवं आः छु जुइगु जुल धकाः थारान्हूगु खँ धाःगु दु । विमान सफलतापूर्वक अवतरण जुइवं सकस्यां लापा थाःगु खः । उगु इलय् सकस्यां द्यःया नां कयाः च्वनाच्वंगु खःसा आपालं यात्रुत ह्वाँय्ह्वाँय् ख्वयाच्वंगु खः ।
LEAVE YOUR COMMENTS