राज्यया फुक्क निकायय् छगू जक जाति !

वर्तमान व्यवस्थायात पहिचान व संघीयताय् आधारित धाःसां नं आः हानं राज्यया थीथी निकायय् छगू हे जक जातिया वर्चश्व जुयाः समावेशी मजूगु द्वपं ससफोया सहअध्यक्ष राजेन्द्र श्रेष्ठं बियादीगु दु । संसदय् न्ववासें वय्कलं राष्ट्रपति, प्रधानमन्त्री, सभामुख लिसें प्रधानन्यायाधीश तकं छगू हे जातियापिं जूवंगु खँ कँसें धयादिल, ‘थज्याःगु संघीयतां देशया विकास जुइ मखु ।’

वय्कलं धयादिल, ‘थ्व ला न्हापा मचाबलय् म्हितेबलय् तँलाई पुच्छर, मलाई टाउको बराबर भयो धायेथें जक जुल ।’ वय्कलं नेपालमण्डलया गौरवया ब्याख्या यासें अमेरिका युरोप थेंज्याःगु देय् विकास मजूनिगु इलय् नेपाल मण्डलया विकास जूगु खँ धयादिसें न्हूगु नेपाः दयेकेगु खःसा पहिचानया मुद्दायात निं सम्बोधन यायेमाःगु खँय् बः बियादिल । वय्कलं धयादिल, ‘आःया आवश्यकता पहिचान सहितया संघीयता कार्यान्वयन हे मू एजेन्डा जुइमाः ।’

नेपाल मण्डल ऐतिहासिक लागा जूगुलिं थनया गौरवयात ल्यंकेगु निंतिं नं पहिचान हे मू मुद्दा जुयाच्वंगु खँ नं वय्कलं धयादीगु दु ।