न्हूगु हे अविश्वासया तयारी

येँ – प्रधान मन्त्री केपी ओली विरुद्ध आः न्हूगु हे अविश्वासया प्रस्ताव दर्ता याइगु जूगु दु । दाहाल–नेपाल पुचलं संसद् विघटन याःकुन्हु दर्ता यानातःगु अविश्वास प्रस्तावयात आः थाति तयेत्यंगु दु । वंगु फागुन ११ गते सर्वोच्च अदालतं विघटित संसद पुनस्र्थापना यायेवं दाहाल–नेपाल पुचलं तयातःगु अविश्वासया प्रस्ताव छु जुइ धइगु न्ह्यसः ब्वलनाच्वंगु इलय् उगु पुचलं न्हापाया प्रस्तावयात थाति तयाः न्हूगु प्रस्ताव यंकेगु तयारी याःगु खः ।

सर्वोच्चं संसद पुनस्र्थापनाया आदेश बीधुंकाः देय्या राजनीति बिस्कं कथं न्ह्याःगुलिं आः न्हूगु प्रस्ताव दर्ता यायेगु तयारी जुयाच्वंगु खँ धाःगु दु । दाहाल–नेपाल पुचलं न्हापा दर्ता यानातःगु प्रस्ताव न्ह्यःने मयंकेत्यंगुया कारण राजनीतिक व कानुनी खः धाःगु दु । सर्वोच्चं संसद विघटन निर्णययात बदर यायेगु झ्वलय् बिउगु आदेशय् प्रम ओलीं संसद विघटन याःगु इलंनिसें जूगु फुक्क कथंया राजनीतिक गतिविधियात शून्य ई धाःगुलिं पुलांगु प्रस्ताव नं ज्या मवइगु जुयाः न्हूगु प्रस्ताव यंकेगु बारे पार्टीइ सहलह जूगु खँ सीदुगु दु ।

प्रम ओलीं पुस ५ गते संसद विघटनया सिफारिस याःगु खःसा राष्ट्रपति विद्यादेवी भण्डारीं वकुन्हु हे उकियात सदर याःगु खः । मेखे वकुन्हु हे दाहाल–नेपाल पक्षं अविश्वासया प्रस्ताव दर्ता याःगु खः ।

अथे खःसां पुस ५ गते दर्ता जुयाच्वंगु अविश्वास प्रस्ताव न्ह्यःने न्ह्याकेगु वा मन्ह्याकेगु धइगु अधिकार राजनीतिक दलयात सिबें सभामुखयात दुगुलिं नं नेकपां पुलांगु प्रस्तावयात न्ह्यःने मयंकेगु निर्णय याःगु खः ।

सर्वोच्च अदालतं संसद विघटन विरुद्ध याःगु निर्णयलय् धयातःगु दु, ‘प्रतिनिधिसभा विघटनया निर्णय, विज्ञप्ति लिसें व सम्बन्धी फुक्कं ज्या असंवैधानिक जूगुलिं शुरुवातंनिसें कानुनी प्रभाव शून्य जुइ कथं उत्प्रेषणया आदेशं बदर ठहर जुइ, संघीय संसदया प्रतिनिधिसभा उगु असंवैधानिक विघटन स्वयां न्ह्यःया स्थितिइ पुनस्र्थापन जुयाः यथास्थितिइ हे ज्या यायेत सक्षम व समर्थन दु ।’

उकथं हे सीदु कथं दाहाल–नेपाल पक्षं दर्ता याःगु अविश्वासया प्रस्तावय् भावी प्रधानमन्त्रीया रुपय् नेकपाया अध्यक्ष पुष्पकमल दाहालया नां तयातःगु दु । थुकिं यानाः कांग्रेस व जसपालिसे सत्तासमीकरण यायेत समस्या जुइफइगु जूगुलिं नं पुलांगु प्रस्तावयात न्ह्यःने यंकेत समस्या जुइगु खँ धाःगु दु ।

अथे हे यदि पुलांगु अविश्वासया प्रस्ताव छुं गथे जुयाः असफल जुल धाःसा मेगु दछि तक अविश्वास प्रस्ताव हये मदइगु संवैधानिक व्यवस्था दु । उकिं अविश्वास प्रस्ताव फेल मजुइक न्ह्याः वनेमाःगु जूगुलिं नं दाहाल–नेपाल न्हूगु प्रस्तावया तयारी याःगु खँ धाःगु दु ।

अथे जुयाः आः दाहाल–नेपाल पुचलं कांग्रेस व जसपाया विश्वास कयाः जक न्हूगु प्रस्ताव दर्ता यायेगु तयारी यानाच्वंगु खँ सीदुगु दु ।
अविश्वासया प्रस्ताव बहुमतं पारित जुल धाःसा संविधानया धारा १०० (६) कथं प्रधानमन्त्री पदमुक्त जुइगु व्यवस्था दु । अविश्वासया प्रस्ताव पारित जुयाः प्रधानमन्त्रीया पद रिक्त जुल धाःसा संसदय् बहुमत दुम्ह मेम्ह सांसदयात प्रधानमन्त्री नियुक्त यायेगु प्रावधान दु ।

सम्बन्धित बुखँ

LEAVE YOUR COMMENTS