ने. सं. ११४४ कौलाथ्व तृतीया -

श्रीलंकाय् छन्हुया निंतिं नं चिकं मदयेधुंकल

एजेन्सी- न्हय्गू दशक लिपा दकलय् तःधंगु आर्थिक संकटय् लानाच्वंगु श्रीलंकाय् छन्हुया निंतिं नं गाक्क पेट्रालियम पदार्थ मदयेधुंकूगु दु । देय्या ऊर्जामन्त्री कञ्चन विजेशेकरं यदि न्ह्याब्लें थें चिकं इनेगु खःसा छन्हुयात नं चिकं मदयेधुंकूगु खँ धाःगु दु । मन्त्री विजेशेकरं मेगु चिकं निवाः जक वइगु खँ नं धाःगु दु ।

मन्त्री विजेशेकरया कथं श्रीलंकाय् सोमवाः तक मुक्क्ं १२ हजार ७७४ टन डिजेल व ४ हजार ६१ टन पेट्रोल ल्यं दुगु खः । मन्त्रीया कथं पेट्रोल वइगु २२–२३ तारिखय् जक श्रीलंका थ्यनीसा डिजेल मेगु वालय् वयेफु । तर थ्व चिकं न्यायेत नं गाक्क विदेशी मुद्रा मदुगु खँ मन्त्री विजेशेकरं धाःगु दु । श्रीलंकाया केन्द्रीय बैंकं चिकं न्यायेत मुक्कं १२ करोड पचास लाख डलर बीगु जूगु दु, तर आः हयेत्यंगु चिकंया निंतिं जक हे ५८ करोड ७० लाख डलर आवश्यक दु । अथेहे थ्व वालय् न्याःगु चिकंया जक ८० करोड डलर पुले अझं ल्यं दनि ।

विदेशी मुद्राया अभावं श्रीलंकाय् तःधंगु आर्थिक संकट वयाच्वंगु दु । न्हियान्हिथंयात माःगु सामान आयात यायेत तकं ध्यबा मदुगुलिं इन्धन जक मखु, खाद्य पदार्थ व वासः तकं आयात याये मफयाच्वंगु दु । सरकारं छुं ई न्ह्यवनिसें हे अत्यावश्यक सेवा बाहेक मेमेगु गाडीयात डिजेल व पेट्रोल मबीधुंकूगु दु । सन् १९७०या दशकय् इन्धन आपूर्ति संकट वःगु ई धुंकाः चिकं मीगु हे दिकेमाःगु श्रीलंका न्हापांगु देय् जूगु खँ विज्ञतय्सं धाःगु दु । उबलय् अमेरिका व युरोपय् तकं चिकं मीगु निंतिं कोटा प्रणाली लागू यायेमाःगु खः ।

श्रीलंका सन् १९४८ य् बृटिस साम्राज्यपाखें स्वतन्त्र जूगु देय् खः । स्वतन्त्रता लिपा श्रीलंकां न्हापांखुसी थथे चरम आर्थिक संकट फयेमालाच्वंगु खः ।

उद्धारया कुतः
वंगु बिहिवाः अन्तर्राष्ट्रिय मुद्रा कोष (आइएमएफ)या छगू पुचलं श्रीलंकाया आर्थिक संकट ज्यंकेगु निंतिं स्वंगू अर्ब डलर ग्वाहालि बीगु निंतिं खँ न्ह्याकूगु खः, तर थ्व प्याकेजय् अझं सहमति मजूनि । तर आइएमएफया वार्ता पुचलं थ्व प्याकेजया निंतिं महत्वपूर्ण प्रगति जुयाच्वंगु खँ धाःगु दु ।श्रीलंकां दंगु भावं चिकं न्याये दइ ला धकाः रुस व कतारय् थः प्रतिनिधितय्त
छ्वयातःगु दु ।