ट्रम्पविरुद्ध महाभियोगया तयारी

एजेन्सी – अमेरिकी राष्ट्रपति डोनाल्ड ट्रम्प विरुद्ध क्वय्या सदन हाउस अफ रिप्रेजेन्टिभय् महाअभियोगया प्रस्ताव हयेगु निंतिं तयारी सुरु जूगु दु । डेमोक्रेटिक पार्टीया नेतातय्सं वइगु मंगलवाः तकया दुने थ्व प्रस्तावय् मतदान जुइफइगु खँ धाःगु दु ।

क्वय्या सदनया डेमोरक्र्याट नेतातय्सं राष्ट्रपतिविरुद्ध दंगायात प्रोत्साहन याःगु आरोप बीत्यंगु दु । संसद भवन क्यापिटल हिलय् हिंसात्मक ढंग नियन्त्रण यायेगु ज्याय् थः समर्थकतय्त ट्रम्पं प्रोत्साहन याःगु धासें महाअभियोग प्रस्ताव हयेत्यंगु खः । संसदीय दलया सचेतक जेम्स क्लाइबर्नं सिएनएनलिसे खँ ल्हासें थ्व वालय् हे थ्व प्रस्ताव वइगु खँ धयादीगु खः । तर जो बाइडनं राष्ट्रपतिया शपथ ग्रहण यायेधुंका: वय्कःया सछिन्हुया कार्यकाल पूमवंकं सिनेटय् सुनुवाईया निंतिं धाःसा मछ्वइगु खँ धाःगु दु ।

क्लाइबर्नं धयादीगु दु, ‘जो बाइडेनयात थःगु प्राथमिकता निर्धारण यायेत व थुकिया कार्यान्वयन सुरु यायेत सछिन्हु बी, अले जक थ्व प्रस्ताव सिनेटय् छ्वयेगु जुइ ।’

सछिन्हु लिपा जक थ्व प्रस्ताव सिनेटय् छ्वल धाःसा जक बाइडनं न्हूगु मन्त्रिपरिषद् निश्चित यायेगु मेमेगु नीति सुरु यायेफइ । थ्व स्वयां न्ह्यः हे सिनेटय् प्रस्ताव थ्यन धाःसा बाइडनं नं थःगु ज्या न्ह्याकेत पियाच्वनेमालीगु जुइ । मेखे ह्वाइट हाउसं धाःसा आः तयेधाःगु महाभियोग राजनीतिक रुपं प्रेरित धासें महाभियोगया सम्भावना मदु धाःगु दु ।