सरकारं वित्तीय संकट हःगु द्वपं
येँ – प्रमुख प्रतिपक्षी दल एमालें सरकारं प्रतिनिधिसभाया बैठक दिकाः उकिया द्वपं प्रतिपक्षयात क्वचिनाः देशय् वित्तीय संकट ब्वलंकेत स्वःगु द्वपं बिउगु दु । प्रतिनिधिसभाया बैठक वइगु असोज ४ गते तक स्थगित यायेवं म्हिगः तकया दुने बजेट प्रतिस्थापन विधेयक पारित जुइ मफुगुलिं सरकारयात खर्च यायेत समस्या ब्वंलंगु खःसा सरकारं उकिया द्वपं प्रतिपक्षयात बिउगु दु ।
महासचिव ईश्वर पोखरेलं म्हिगः छगू विज्ञप्ति जारी यासें सरकारयात उगु द्वपं बिउगु खः । विज्ञप्तिइ धयातःगु दु, ‘आर्थिक दँ शुरु जूगु ताः ई वनेधुंकाः इलय् प्रतिस्थापन विधेयक तयारीया नामय् सरकारं अनावश्यक ई छ्वःगुलिं हे थौंया वित्तीय संकट वःगु खः ।’ थःत इच्छा जूगु विजनेश स्वेच्छाचारी ढंगं न्ह्यःने यंकूगु सरकारं भदौ ३० गते दुने बजेट पारित यायेमाःगु खँ ल्वःमंकूगु खःला धइगु न्ह्यसः न्यँसें विज्ञप्तिइ धयातःगु दु, ‘असोज ४ गते तक संसदया बैठक छाय् लिछ्यात, मजूगु ज्याया फुक्कं दोष प्रतिपक्षयात क्वचिनेगु थ्व सुतुरमुर्ग चाल जक खः ।’
सरकारं प्रतिपक्षं पंगः थंगुलिं इलय् बजेट पारित मजूगु थेंज्याःगु भ्रम ब्वलंकाच्वंगु दु धासें विज्ञप्तिइ धयातःगु दु, ‘प्रतिनिधिसभाया बैठक शुरु जूगु ताः ई तक सरकारया नितिं बजेट प्राथमिकताया विषय मजुल, बरु थुकिया दथुइ प्रतिपक्षी दलयात षडयन्त्रपूर्ण ढंगं विभाजन यायेगु नितिं अध्यादेश हयेगु प्रयोजनया नितिं संसद अधिवेशन स्थगित यात, दल विभाजन सम्बन्धी अध्यादेश हये स्वयां न्ह्यः हे
प्रतिपक्षी दलया सांसदतय्त कारबाही यानागु सुचं पिमथँसे दल विभाजनयात प्रोत्साहन बीगु ज्या सभामुखपाखें जुल ।’
विज्ञप्तिइ सरकारं प्रतिस्थापन विधेयकपाखें बजेट कटौती याःगुलिं नं आपत्ति प्वंकातःगु दु । सन्तुलित विकासया अवधाराण कथं प्रतिनिधिसभाया दुजःपिनि इनाप कथं न्ह्यःने न्ह्याकूगु निर्वाचन क्षेत्रस्तरीय रणनीतिक सतक व पालिका स्वाइगु पहुँच मार्ग लगायत १४०० स्वयां अप्वः आयोजना कटौती याःगुलिं नं विरोध प्वंकातःगु दु ।
LEAVE YOUR COMMENTS