ने. सं. ११४३ चौलाथ्व पारू -

ख्वप अस्पतालय् छन्हुं झिगू तःधंगु शल्यक्रिया

ख्वप(नेपालभाषा टाइम्स)- छगू इलय् सामान्य ल्वय् जक जूसां लिक्कं सरकारी अस्पताल दयेक दयेकं नं निजी अस्पतालय् वनीपिं थनया सर्वसाधारणत थौं ततःधंगु ल्वचं कःसां सरकारी अस्पतालय् वनेगु क्रम सुरु जूगु दु । ख्वप अस्पतालं लिपांगु इलय् म्हो शुल्कय् स्तरीय सेवा बिया हयेवं स्थानीयवासीत निजी अस्पताल वनेगु त्वःताः आः ख्वप अस्पतालय् वयेगु याःगु खः ।

स्वनिगःया मेमेगु ततःधंगु अस्पतालया तुलनाय् बागमति प्रदेश अन्तर्गतया ख्वप अस्पतालय् चिकित्सक, नर्स लगायतया कर्मचारीतय् ल्याः धाःसा गाक्कं म्हो जक दु । अथे खःसां नं अस्पतालं बिया वयाच्वंगु सेवा लिपांगु इल्य् वीर अस्पताल वा मेमेगु निजी अस्पतालया स्वयां म्हो मजू । २७ म्ह विशेषज्ञ चिकित्सक, १७ म्ह चिकित्सक नापं २३४ म्ह कर्मचारी दुगु ख्वप अस्पतालय् थौंकन्हय् न्हियान्हिथं झिगू ततःधंगु शल्यक्रिया (अप्रेशन) जुयाच्वंगु दु । अस्पतालया प्रमुख मेडिकल सुपरिटेण्डेन्ट डा. सुमित्रा गौतमया कथं वंगु आइतवाः जक छन्हुया दुने अन झिगू तःधंगु अप्रेशन सफलतापूर्वक जूगु दु । अथे हे सोमवाः नं गुंगू शल्यक्रिया याःगु खःसा व नं ताःलात ।

वंगु आइतवाः अस्पतालय् मचाछेँया ट्यूमर, न्हाय्पंया जालि गुनाः ताये मदुगु, मचाछेँया ला कुचा लिकाःगु छगू, जटिल प्रकृतिया डेलिभरीया शल्यक्रिया याःगु खः । निदँ न्ह्यःतक न्हियान्हिथं उपचारया लागिं अस्पतालय् वइपिं बिरामीया ल्याः निसःया जःखः जक दुगुलिइ आः उकिया ल्याः थहां वनाः न्यासःनिसें न्हय्सः तकं थ्यंगु अस्पतालया रेकर्डपाखें खनेदु । आइतवाःया जक अस्पतालया तथ्यांक स्वयेगु खःसां नं ओपीडीइ जाँचया लागिं ५६२ म्ह वःगु रेकर्ड दु ।

आइतवाः आइसीयुया झिगू वेडय् न्हय्म्ह व एचडीलय् खुम्ह मध्ये प्यम्ह भर्ना जूगु अस्पतालया तथ्यांकं खनेदुगु दु । न्हापा सामान्य बिरामी जुयाः अस्पतालय् वनीबलय् नं तुरुन्त मेगु तःधंगु अस्पतालय् रेफर यायेगु यानाच्वंगु थ्व आः अस्पतालं म्हो शुल्कय् नं स्तरीय सेवा प्रदान यायेवं स्थानीय जक मखु काभ्रे, सिन्धुपाल्चोक, दोलखा, सिन्धुली लगायतया जिल्लांनिसें वासः याकेत वइपिनि ल्याः न्ह्यथनेबहः जुइक अप्वयाच्वंगु अस्पताल विकास समितिया अध्यक्ष रमन कायस्थं कनादिल ।

कायस्थयाकथं लिपांगु इलय् नुगःचु, न्हाय्पं, नसाल्वय् लगायतया सेवा विस्तार याःगुलिं अस्पतालय् वइपिं बिरामीतय् चाप अप्वःगु खः । डा. गौतमया कथं अस्पतालं चान्हिं बिरामीया उपचारय् खटे जूपिं चिकित्सक, नर्स लगायत कर्मचारीयात पुरस्कृत यानाः हौसाल बियाच्वंगु दुसा उपचारय् लापर्वाही याइपिं व क्वछिनातःगु इलय् ज्याय् मच्वनीपिंत कारवाहीया नीति काःगुलिं नं बिरामीतय्सं इलय् हे गुणस्तरीय उपचार चूलाकाच्वंगु दु ।