प्रहरी महानिरीक्षक खनालपाखें प्रहरी स्कुल निरीक्षण

येँ – प्रहरी महानिरीक्षक सर्वेन्द्र खनालं चितवनय् च्वंगु नेपाल प्रहरी स्कुलया निरीक्षण यानादीगु दु । प्रहरी महानिरीक्षक खनालं आइतवाः प्रदेश नं. ३ अन्तर्गत चितवनया शान्तिपुरय् च्वंगु स्कुलया निरीक्षण यानादीगु खः ।

उगु इलय् प्रहरी महानिरीक्षक खनालं स्थानीय निकायलिसे समन्वय व सहकार्य यानाः जग्गासहित पुलांगु स्कुल नेपाल प्रहरीं संचालन यायेगु निर्णय याःगु जानकारी बियादिसें स्कुलया थप विकास व भौतिक संरचना निर्माणया निंतिं प्रहरी प्रधान ज्याकूपाखें माःगु ग्वाहालि यायेत थः प्रतिवद्ध दु धयादिल ।

लिसें वय्कलं गुणस्तरीय शिक्षा बीगु लक्ष्य कथं स्कुल स्थापना यानागु चर्चा यासें स्कुलं म्हो इलय् हे उल्लेख्य रुपं प्रगति यासें न्ह्याः वनाच्वंगु दु धयादिल । ज्याझ्वलय् भरतपुर महानगरपालिकाया प्रमुख रेणु दाहालं नेपाल पुलिस स्कुल संचालन व भौतिक संरचना निर्माणया निंतिं महानगरपालिकापाखें न्ह्याबलें नं समर्थन यासें ग्वाहालि यानाच्वनेगु जुइ धयादिल ।

स्कुलया स्थापना व संचालनबारे समादेशक प्रहरी निरीक्षक धर्मबहादुर अधिकारीं प्रस्तुतीकरण बियादीगु ज्याझ्वलय् स्कुलया प्राचार्य सुन्दर बुढाथोकीं लसकुस यानादीगु खः ।

ज्याझ्वलय् प्रदेश नं. १ प्रहरी ज्याकू विराटनगरया प्रहरी नायब महानिरीक्षक केदार रिजाल, प्रदेश नं २ प्रहरी ज्याकू जनकपुरया प्रहरी नायब महानिरीक्षक हरिबहादुर पाल, प्रदेश नं. ३ प्रहरी ज्याकू हेटौंडाया प्रहरी नायब महानिरीक्षक दिपककुमार थापा, चितवनया प्रमुख जिल्ला अधिकारी, वरिष्ठ प्रहरी उपरीक्षकपिं, जिल्ला प्रहरी ज्याकू चितवनया प्रमुख, विद्यालय व्यवस्थापन समितिया, स्थानीय संघसंस्थाया पदाधिारी लगायतपिनिगु उपस्थिति दुगु खः ।

नेपालभाषा टाइम्स

च्वमिया मेमेगु

• नेवाः प्रतिष्ठान गठन यायेत माग
• केएनकेया ग्राजुएन ज्याझ्वः
• सक्व सांस्कृतिक संरक्षित क्षेत्र प्रस्तावित ऐन लःल्हात
• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल