मन्दः च्वज्या व म्हपुजा

येँ – थनया खुसिबुँइ च्वंगु काठमाडौं नेवाः किन्डरगार्टेनय् मन्दः च्वज्या कासालिसें मंकाः म्हपुजा ज्याझ्वः जुल । ज्याझ्वः किन्डरगार्टेनया प्रांगणय् जूगु खः । युकेजी तगिमय् ब्वनाच्वंपिं मस्तय् अभिभावकपिनिगु दथुइ जूगु मन्दः च्वज्या कासाय् युकेजी तगिंया ब्वँमि स्वीकृति श्रेष्ठया अभिभावक अमुना जोशी श्रेष्ठ दकलय् बांलाःगु मन्दः च्वयाः उत्कृष्ट सिरपाः त्याकादीगु खः । अथे हे मेम्ह अभिभावक रियाज श्रेष्ठया प्रतिनिधिकथं झायाः मन्दः च्वयादीम्ह ८ दँ दुम्ह रियाना श्रेष्ठं नं मन्दः च्वयादीगु खः । संचारकःमि विराजकाजी राजोपाध्यायं उत्कृष्ट मन्दःया ल्यज्या यानादीगु खः ।

अभिभावकपिंसं च्वःगु उगु हे मन्दलय् तयाः लिपा ब्वँमि मस्तय्त मंकाःकथं म्हपुजा नं याःगु खः । पुलांम्ह मिस नेवाःलिसें लिपि सुन्दरीकथं म्हसिउम्ह सुनिता डंगोलं मस्तय्त म्हपुजा याकादीगु खः । उगु इलय् युकेजी तगिमय् ब्वनाच्वंपिं गुम्ह मस्तय्त मंकाः म्हपुजा याःगु खः ।

ज्याझ्वलय् मूपाहां डंगोल, ल्यज्यामि राजोपाध्याय, किन्डरगार्टेनया निर्देशक राजेन्द्र महर्जनं मन्दः, स्वन्ति नखः, न्हूदँया थीथी पक्षयात कयाः नुगःखँ तयादीगु खः । लिसें निर्देशक महर्जनं मूपाहां, निर्णायक व उत्कृष्ट मन्दः च्वमि श्रेष्ठयात हनापौलिसें लुमन्ति चिं नं लःल्हानादीगु खःसा विद्यार्थी प्रतिनिधि रियानायात नं विशेष सिरपाः लःल्हानादीगु खः ।