सर्वदलीय बैठक निष्कषविहीन
येँ – सभामुख अग्निप्रसाद सापकोटां सःतूगु सर्वदलीय बैठक छुं हे निष्कर्ष पिहां मवयेक क्वचाःगु दु । प्रमुख प्रतिपक्ष एमालें लगातार संसद पंगः थनाच्वंगुयात चीकेगु नितिं म्हिगः सर्वदलीय बैठक च्वंगु खःसा एमाले बैठकय् मवयेवं बैठक निष्कर्षविहीन जूगु खः ।
एमालेया अध्यक्ष केपी शर्मा ओलीयात लगातार फोन यात नं फोन मल्ह्वंगु खँ जनमोर्चाया उपाध्यक्ष दुर्गा पौडेलं जानकारी बियादीगु दु । वय्कलं म्हिगः पत्रकारपिं लिसे खँ ल्हायेगु झ्वलय् धयादिल, ‘संसदय् पंगः थनेगु खँ तःधंगु मखु, तर संवादय् हे मवयेगु उपयुक्त मखु ।’
म्हिगः च्वंगु बैठकय् नेपाली कांग्रेस, नेकपा माओवादी केन्द्र, नेकपा एकीकृत समाजवादी, जसपा, लोसपा, राष्ट्रिय जनमोर्चा व नेपाल मजदूर किसान पार्टीं ब्वति काःगु खः ।
एमालेया अध्यक्ष ओलीं पार्टीया सुं नं नेतायात सर्वदलीय बैठकय् मवनेत निर्देशन बिउगु उपनेता सुवास नेम्वाङ कनादीगु दु । उकथं हे सर्वदलीय बैठकय् वयेत कानुन मन्त्री ज्ञानेन्द्रबहादुर कार्कीं नं अध्यक्ष ओलीयात सम्पर्क तयेगु कुतः याःगु खःसा वय्कःया कुतः नं असफल जूगु खँ धाःगु दु ।
सर्वदलीय बैठक च्वने न्ह्यः एमालेया प्रमुख सचेतक विशाल भट्टराईं सभामुखयात फोन यानाः बैठकय् सुयात सुयात सःतूगु खः धकाः न्यनादीगु खः । लिसलय् सभामुख फुक्कं दलया शीर्ष नेतापिंत सःतूगु जानकारी बियादीगु खः । सभामुखया लिसः लिपा भट्टराईं माधव नेपालयात सःतूगु बैठकय् थःपिं मवयेगु धासें ‘एमाले व सभामुख दथुया विवाद खः, दुनियाँयात सःताः छु निकास पिहां वइ ले ?’ धकाः न्ह्यसः तयादीगु खः ।
प्रमुख सचेतक भट्टराईं संसदया पंगः चीकेगु खःसा एमालेया निर्णय कथं झिंप्यम्ह सांसदयात कारबाही याःगु सुचं पिकायेत वा लँपुं चायेकाबीत सुझाव बियादीगु खः । सभामुख सापकोटां धाःसा झिंप्यम्ह सांसद बारे कानुन कथं निर्णय यानागु खँ धासें संसद न्ह्याकेमाःगु खँ बः बिउगु खँ सीदुगु दु । थ्वहे झ्वलय् म्हिगः सर्वदलीय बैठकय् ब्वति काःपिं नेतातय्सं प्रतिपक्ष एमाले लिसे संवादया वातावरण दयेकेत सभामुखयात सुझाव बिउगु दु ।
LEAVE YOUR COMMENTS