‘पूर्वाधारं जक समाजया विकास जुइमखु’

येँ- नेवाः पत्रकार राष्ट्रिय दबू येँ जिल्लाया ग्वसालय् १५ न्हुया आधारभूत पत्रकारिता क्षमता अभिवृद्धि तालिम न्ह्याःगु दु । तालिम वंगु आइतवाः येँ महानगरपालिकाया निर्वतमान प्रवक्ता नापं येँमपा १५ वडाया नवनिर्वाचित वडाध्यक्ष ईश्वरमान डंगोलं उलेज्या यानादीगु खः ।
उलेज्या ज्याझ्वलय् न्ववासें डंगोलं पत्रकारिता समाजया न्हाय्कं जूगुलिं सत्यतथ्य पित हयेत पत्रकारतय्सं ध्यान बीमाः धयादिल । तःतःधंगु पूर्वाधार, तबालागु सतक जक दयां समाजया विकास जुइमखु, समाजया विकासया निंतिं वृत्तिविकासया नं उलि हे आवश्यकता दुगु खँ डंगोलं धयादिल । समाजय् जनचेतना बीगु थीथी वृत्तिविकासया तालिम मध्ये अझ पत्रकार तालिमपाखें प्राप्त जूगु ज्ञानं खःगु सुचं खःगु इलय् व खःगु थासय् तक थ्यंकेत तःधंगु ग्वाहालि दइगु नं वय्कलं धयादिल ।

येँ महानगरपालिका सामाजिक विभागया प्रमुख दीपक अधिकारीं जनस्तरलिसे सामाजिक कार्यय् ज्याय् याये खंगुलिं जिमित तसकं खुसि लगे जूगु दु धासें वंगु दँय् बजेटपाखें क्वचायेमाःगु थुगु तालिम कोभिडया हुनिं थुगु दँय् जूवनाच्वंगु खँ धयादिल ।

नेवाः पत्रकार राष्ट्रिय दबूया केन्द्रीय नायः सुरजवीर वज्राचार्यं येँ महानगरपालिकानापया सहकार्यं दबूपाखें आपालं समाजिक ज्या याये खंगुलिं महानगरपालिकाया निवर्तमान मेयर विद्यासुन्दर शाक्य, उपमेयर हरिप्रभा खड्गी श्रेष्ठ नापं सकल महानगर परिवारयात सुभाय् बियादिल । कोभिडया हे झ्वलय् महानगरपाखें उपलब्ध जूगु ग्वाहालिया कारणं यक्व हे पत्रकार सहकर्मिपिंत तःधंगु ग्वाहालि जूवंगु खँ वज्राचार्यं न्ह्यथनादिल । नापं नेवाः पत्रकार कल्याणकारी कोषया निंतिं महानगरं बिया वयाच्वंगु ग्वाहालि निरन्तरता जुइमा धकाः नं वय्कलं बः बियादिल ।

ज्याझ्वलय् मुख्य प्रशिक्षक नेपालभाषा टाइम्स न्हिपौया सम्पादक सुरेशकिरण मानन्धरं सूचना तथा सञ्चारया महत्वया बारे जानकारी बियादिल । वय्कलं थौंया युगय् सूचना तथा सञ्चारया गुलितक महत्व दु धकाः वंगु वैशाख ३० गते जूगु चुनावपाखें सकसितं जानकारी दये धुंकल जुइ । छुं नं कथंया राजनीतिक पार्टीया उम्मेदवारया पम्प्लेट, पर्चा, पोस्टर विना छुं नं पार्टीपाखें छु पदय् सु उम्मेदवार चुनावी मैदानय् दु धयागु आम जनतायात थ्व हे सूचना तथा सञ्चारया माध्यमपाखें जानकारी दुगु प्रमुख प्रशिक्षक सुरेश किरणं धयादिल ।

ज्याझ्वःया सभापति नेवाः पत्रकार राष्ट्रिय दबू येँं जिल्लाया नायः अर्विन्द्रमान सिंहं भाषा, कला, साहित्य, संस्कृतिया उत्थान धइगु हे समग्र जातीया उत्थान खः, व जातीया उत्थान धइगु हे देश विकासया लँपु जूगु धयादिल । वहे मान्यता कथं नेवाः पत्रकार राष्ट्रिय दबू, येँ जिल्लां समग्र नेवाःलगायत आम नेपालीतय्त सचेतनाया विकास यायेगु उद्देश्यसहित थीथी ज्याझ्वःया ग्वसाः ग्वया वयाच्वनागु धयादिल ।

वय्कलं १५ न्हुतक संचालन जुइगु थुगु तालिमय् येँय् च्वनाः पत्रकारिता यायेबलय् स्थानीय बिषययात गुकथं ल्ह्वनेगु, उगु बिषययात कयाः गुकथं समाचार च्वयेगु, किपा कायेबलय् छु खँय् ध्यान बीगु, फोटो फिचर गुकथं तयार यायेगु व उकियात गुकथं प्रभावकारी दयेकेगु, क्यामरा व स्मार्ट फोनपाखें गुकथं बांलाःगु फोटो कायेगु, थःम्हेस्यां च्वइगु समाचारयात गुकथं सशक्त रुपय् प्रस्तुत यायेगु आदि थीथी बिषययात कःघानाः तालिम बीगु जानकारी बयिादिल ।

ज्याझ्वलय् फोनिज येँं शाखाया नायः शैलेस डंगोल, यल शाखाया सञ्जय श्रेष्ठ, पत्रकार दबू येँं शाखाया निवर्तमान नायः नातीकाजी महर्जन व तालिमय् स्थानीय प्रतिस्थित व्यक्तिपिनिगु नापं ६०म्ह प्रशिक्षर्थीपिनिगु ब्वति दुगु खः ।

सम्बन्धित बुखँ

LEAVE YOUR COMMENTS