सत्यां मल्याक पर्यटकतय् उद्धार

येँ (नेपालभाषा टाइम्स)÷ कास्कीया अन्नपूर्ण (एबिसी) व माछापुच्छ«े आधार शिविर (एमबिसी) पदमार्गय् फसे जूपिं सत्या स्वयां अप्वः पर्यटक व गाइडपिनिगु उद्धार याःगु दु । वंगु बिहीवाः निसें च्वापु वा गाःगुलिं पदमार्गय् पर्यटकपिं फसे जूगु खःसा छुं पर्यटक व गाइड तनाच्वंगु दु । म्हिगः पोखरां ब्वःगु सिम्रिक एयरया हेलिकप्टरपाखें उमिगु उद्धार याःगु खः ।
उद्धार याःपिं मध्ये पीम्ह नेपाःमि जूगु खँ सिम्रिक एयरं जानकारी बिउगु दु । नेपाःमि, विदेशी, पर्यटक गाइड, पोर्टर व होटल व्यवसायी समेत यानाः उद्धार यायेगु ज्या जूगु खँ धाःगु दु । उद्धारया निंतिं सिम्रिक एयरं म्हिगः झिंन्यागू स्यवां अप्वः उडान याःगु खः ।
अन्नपूर्ण आधार शिविर पदमार्गय् शुक्रवाः तंपिं प्यम्ह कोरियाली व छम्ह नेपाःया गाइड धाःसा अझं बेपत्ता जुयाच्वंगु दु । बेपत्ता जुयाच्वंम्ह नेपाली गाइड सरोज परियार, कोरियाली नागरिक लि मिन सु व जिन पिल बोङ,मिजंपिं खःसा किम सुक जा व छोइ ह्यो वन मिसांपिं जूगु खँ ट्रेकिङ एजेन्सीज एसोसियसन अफ नेपाल (टान) पोखरां धाःगु दु ।
झिंछम्हेसिया पुचलय् वंगु कोरियाली पुचःया न्हय्म्ह जक सम्पर्कय् वःगु खँ धाःगु दु । थः नागरिक हिमपातय् लायेवं कोरियाली दूतावासं हेलिकप्टर छ्वयाः उद्धार याःगु दु । च्वापु गायाच्वंगुलिं उद्धार ज्याय् नं समस्या वयाच्वंगु खँ धाःगु दु । उगु पदमार्गय् मेपिं विदेशी पर्यटक व गाइडपिं तं तनाच्वंगु आशंका याःगु दु ।

थोराङला पासय् प्यम्ह चिनियाँ सम्पर्कविहिन
येँ (नेपालभाषा टाइम्स)÷ अन्नपूर्ण पदमार्गय् मेपिं प्यम्ह चिनियाँ पर्यटकत नं तनाच्वंगु खँ सीदुगु दु । अन्नपूर्ण पदमार्ग अन्तर्गत लाःगु ५४१६ मिटर उचाइया थोराङला पास पार यायेत वंपिं प्यम्ह चिनियाँ पर्यटकत सम्पर्कविहिन जुयाच्वंगु दु । वंगु पुस २७ गते थोराङला पास पाखें वंपिं उपिं थोराङला तक नं मथ्यंगु व अनं लिहां वःगु रेकर्ड नं मदुगु खँ धाःगु दु ।
अन्नपूर्ण संरक्षण क्षेत्र आयोजनां धाःकथं थोराङलाय् सम्पर्कविहिन जुयाच्वंपिं चिनियाँ पर्यटकतय् नां ह्वाङ यिविन, क्याटसियु टिङ, मा क्आिन्लि व अन्वद झाड खः ।

सम्बन्धित बुखँ

LEAVE YOUR COMMENTS