खुसिबाः चलःपाखें सतर्क जुइत इनाप

येँ – जल तथा मौसम विज्ञान विभागं देय्न्यंकं खुसिबाः, चलः वइगु जोखिम अप्वःगुलिं सतर्कता नालेत इनाप याःगु दु । नेपालय् मनुसन दुहां वयेधुंकूगु व आः देन्यंकं न्यना वनाच्वंगु धासें यक्व वा वयाः खुसिबाः, चलः वइगु जोखिम दुगु खँ विभागं धाःगु दु । विभागया कथं शुक्रवाः निसें प्रदेश १, प्रदेश २ व बागमति प्रदेश जुयाः मनसुन दुहांवःगु खःसा लुम्बिनी व गण्डकी प्रदेश जुयाः देय्न्यंकं न्यना वनाच्वंगु दु ।

मनसुन सक्रिय जुयाः वा यक्व वइगुलिं तःधंगु चीधंगु खुसिइ लः अप्वइगु, खुसिचा, धलय् नं आकाझाकां बहाव अप्वयाः तराई व चुरे क्षेत्र डुबानय्लायेफुगु सम्भावना दु धाःगु दु ।

थुगुसी सुदूरपश्चिम, कर्णाली, गण्डकी व लुम्बिनी प्रदेशया फुक्क भाग लिसें प्रदेश नं. १या मध्य व पश्चिम पहाडी व हिमाली भुभागय् सरदर स्वयां अप्वः वा वइगु खँ धाःगु दु । अथेहे लुम्बिनी, गण्डकी व बागमति प्रदेशया तराई व प्रदेश नं. २ या पश्चिम भूभागय् सरदर कथं वा वइगु व प्रदेश नं. १ या तराई व प्रदेश नं. २ या पूर्वी जिल्लाय् सरदर स्यां म्होज क वा वइगु अनुमान विभागया दु ।