महन्थ ठाकुर भारतीय दूतावास वंगु चर्चा

येँ – प्रधान मन्त्री केपी शर्मा ओलीं प्रधानमन्त्रीया लागिं अफर यानातःम्ह जसपाया नेता महन्थ ठाकुर वंगु शुक्रवाः येँया भारतीय राजदूतावासय् दुहां वंगु खँ सीदुगु दु ।

प्रधानमन्त्री ओलीं आः गठन याइगु न्हूगु सरकारया प्रधानमन्त्री जुयादिसँ धकाः अफर बियातःम्ह जसपा नेता शुक्रवाः सुनां मसीक भारतीय दूतावासय् वनाः राजदूत विनय मोहन क्वात्रालिसे खँल्हाबल्हा यानादीगु खँ पिहां वःगु खः । वय्कःपिनि दथुइ अन करिब डेढ घन्टा खँल्हाबल्हा जूगु खँ नं सूत्रं धाःगु दु ।

प्रम लिसें एमाले अध्यक्ष केपी ओलीं आः संयुक्त सरकार गठन यायेगु खःसा प्रधानमन्त्री छि हे जुयादिसँ धकाः ठाकुरयात इनाप यानादीगु खः । प्रम ओलीया थ्व अफर वयेवं जसपा दुने भुखाय् ब्वःगु दु । थ्व अवसरयात मत्वःतेगु लागिं ठाकुरं पार्टी दुने खँल्हाबल्हा न्ह्याकादीगु दुसा पूर्व समाजवादी पार्टीया नेतातय्सं धाःसा उकियात अस्वीकार याःगु दु ।

पूर्व राजपाया नेतातय्सं थ्व अवसरयात उपयोग यायेमाः धासें ठाकुरयात प्रधानमन्त्री दयेके मालीगु खँ न्ह्यःने हःगु दु । यदि थुकिया लागिं माल धाःसा पार्टी हे कुचा यायेमाःसां याये धइगु तकया मनःस्थिति पूर्व राजपा नेतातय्के ब्वलंगु खँ नं सूत्रं धाःगु दु ।

थुकिया लागिं ठाकुरं पूर्व शर्तया रुपय् कुनातःम्ह सांसद रेशम चौधरी–यात त्वःतेमाःगु खँ न्ह्यःने हःगु दु । तर सूत्रं चौधरीयात त्वःतकेत्यंगुया कारण वय्कःया त्वःतेके मालाः सिबें नं संसद दुने ठाकुरया पक्षय् मगाइगु छगू सिट अप्वः खाकेत खः धाःगु दु । जसपाया ३४ सिट मध्ये बछि जक ठाकुरया पक्षय् दु ।

सम्बन्धित बुखँ

LEAVE YOUR COMMENTS