नेपाः व चीन नाकाय् सुख्खा बन्दरगाह

येँ – नेपाः व चीनयात स्वाइगु छगू जक अन्तर्राष्ट्रिय नाका रसुवागढीया टिमुरेय् दयेकेत्यंगु सुख्खा बन्दरगाहया ज्या वइगु निवाःया दुने न्ह्याइगु जूगु दु । नेपाल इन्टरमोडल यातायात विकास समितिया कार्यकारी निर्देशक रविशंकर संैजूयाकथं डिजाइन दयेकेगु व डीपीआर दयेकेगु ज्या क्वचायेधुंकूगुलिं सुख्खा बन्दरगाह दयेकेगु ज्या न्ह्याकेत्यनागु खँ कनादीगु दु ।

वय्कलं छुं छुं प्राविधिक ज्या ल्यं दुगु व उगु ज्या क्वचायेवं सुख्खा बन्दरगाह दयेकेगु ज्या न्ह्याइगु खँ कनादीगु दु । चीन सरकारया ग्वाहालिइ २ गू अर्ब तकाया लागतय् दयेकेत्यंगु उगु आयोजना दयेकेत चिनिया निर्माण पुचः वयेगु शुरु जुइधुंकूगु दु । बन्दरगाह दयेकेगु झ्वलय् चिनिया सरकारं थःगु हे प्रणालीं ठेक्का बीगु खँ धाःगु दु ।

नेपाःया पक्षं आयोजना दयेकेगु झ्वलय् उकिया गुणस्तर व प्राविधिक पक्ष जक स्वःसा गाः । बन्दरगाह स्वदँया दुने पूवंक दयेकेगु ज्या क्वचाइगु खँ धाःगु दु । सुख्खा बन्दरगाहय् ३५० गः तःग्वःगु मालवाहक सवारी साधन पार्किङ यायेफइगु खँ धाःगु दु ।

उगु ड्राइपोर्ट नेपाः व चीन दथुइ जुइगु व्यापार नीदँ तक कःघाये फइगु खँ धाःगु दु । उगु ड्राइपोर्टया डिजाइन चीन सरकारया स्वामित्वय् दुगु आर्किटेक्चरल रिकन्नाइन्सेन्स एण्ड डिजाइन इन्सिच्युड अफ लि टिबेट अटोमेसन रिजन कम्पनींं याःगु खः ।