ने. सं. ११४४ कौलाथ्व दुतिया -

प्रधानमन्त्रीया निर्देशन सचिवतय्सं गुलि पालना याः ?

येँ (नेपालभाषा टाइम्स)- प्रधानमन्त्री पुष्पकमल दाहालं थीथी मन्त्रालय व सचिवतय्त बियादीगु निर्देशनत कार्यान्वयन जू लाकि मजू धकाः स्वयेत अनुगमन न्ह्याकूगु दु ।
प्रधानमन्त्री कार्यालयं नीतिगत सुधारया नितिं थीथी मन्त्रालययात बिउगु निर्देशन कार्यान्वयनया प्रगतिया विषयय् प्रतिवेदन माग यासें सम्बन्धित मन्त्रालययात पौ च्वयेगु ज्या यायेगु लिसें ताकेता नं यानाच्वंगु खँ सीदुगु दु ।

प्रधानमन्त्री कार्यालयं वंगु माघ १० गते थीथी मन्त्रालययात निर्देशन कार्यान्वयनया प्रगति विवरण छ्वयाहयेत पौ च्वःगु खःसा छुं मन्त्रालयं आः तक नं विवरण छ्वया महयेवं मन्त्रालययात फोन यानाः हे ताकेता यानागु खँ प्रधानमन्त्री कार्यालयया सहसचिव खेमराज कोइरालां कनादीगु दु ।

प्रधानमन्त्री दाहालं मन्त्रालयगत समीक्षाया झ्वलय् उद्योग, वाणिज्य तथा आपूर्ति मन्त्रालययात १० बुँदे निर्देशन बिउगु खःसा खानेपानी मन्त्रालय व वातावरण मन्त्रालययात न्हय्गू निर्देशन बियादीगु खः ।

उकथं हे सहरी विकास मन्त्रालययात गरिब, असहाय तथा सीमान्तकृत समुदायया लागिं ‘छगू पालिका, छगू नमूना एकीकृत बस्ती’ या अवधारण लागू यायेगु मोडालिटी व योजना पेश यायेत निर्देशन बियादीगु खः ।

अथे हे प्रधानमन्त्री दाहालं श्रम, रोजगार तथा सामाजिक सुरक्षा मन्त्रालययात रोजगारदाता व श्रमिकया एकीकृत विवरण तयार यानाः माग व आपूर्ति दथुया सन्तुलन कायम यायेगु योजना न्ह्यब्वयेत व उकिया नितिं ७५३ गू पालिकाय् संयन्त्र दयेकेत निर्देशन बियादीगु खः ।

प्रधानमन्त्री कार्यालयं बिउगु निर्देशन कार्यान्वयनया सम्बन्धय् गुलिखे मन्त्रालयं विवरण छ्वयेधुंकूगु दुसा गुलिखे मन्त्रालयपाखें वये ल्यं दनिगु खँ प्रधानमन्त्री तथा मन्त्रिपरिषद कार्यालयया प्रवक्ता नारायणप्रसाद भट्टं कनादीगु दु । वय्कःया कथं गुलिखे विवरण संकलन यायेगु ज्या जुयाच्वंगु व छुं मन्त्रालयपाखें विवरण वयेगु ज्या जुयाच्वंगु दु ।