येँया स्कुल चायेकेगु बारे गृहकार्य शुरु

येँ- देसय् लागू यानाःगु निषेधाज्ञा खारेज यासें आः स्कुल नं चायेकेगु धकाः सरकारं निर्णय याःसां नं येँ महानगरपालिका दुनेया शिक्षण संस्थात चायेके फइगु खः वा मखु धइगु खँ धाःसा आः थथें धाये मफइगु खँ धाःगु दु । अथे खःसां थुकिया बारे गृहकार्य धाःसा न्ह्याकूगु खँ सीदुगु दु ।

येँ मनपा शिक्षा विभागया अधिकारी मोतिराज खनालं ‘नेपालभाषा टाइम्स’ यात बियादीगु जानकारी कथं शिक्षण संस्थालिसे सहलह यानाः शिक्षण संस्थाया ब्वंकेगु तयारी, सुरक्षा मापदण्ड, गुलि विद्यार्थी तयाः ब्वंकेगु धइगु बारे सहलह यानाः जक स्कुल चायेके फइगु सम्भावना दु ।

वय्कलं धयादिल, ‘आः जिमिसं गुगु शिक्षण संस्थाय् गुलि विद्यार्थी दु, उमित सुरक्षा मापदण्ड कथं ब्वंकेगु अवस्था दु कि मदु, आपाः विद्यार्थी दुगु शिक्षण संस्थाय् तत्काल ब्वंके फइगु व्यवस्था दु कि मदु, उकथं आपाः विद्यार्थी दुगु शिक्षण संस्थाय् ग्वःगु सिफ्ट यानाः ब्वंके फइगु धइगु अध्ययन यायेगु ज्या जुयाच्वंगु दु, थ्व फुक्कं अध्ययन लिपा म्हो विद्यार्थी दुगु शिक्षण संस्थाय् तत्काल भौतिक उपस्थितिइ ब्वंकेगु व्यवस्था यायेफइ, तर अप्वः विद्यार्थी दुगु शिक्षण संस्थाय् धाःसा भौतिक रुपं ब्वंकेगु व्यवस्था यायेत थाकुइफु ।’

येँ जिल्ला कोभिड–१९ व्यवस्थापन केन्द्रं स्मार्ट लकडाउनया कार्यविधि कथं विद्यालय चायेके फइगु निर्णय यायेवं येँ मनपां नं स्कुल चायेकेत तयारी कथं अध्ययन न्ह्याकूगु खः । थ्व स्वयां न्ह्यः स्वनिगःया तार्केश्वर नगरपालिकां भौतिक उपस्थितिइ विद्यार्थीयात ब्वंकेगु शुरु याःगु खः । स्वनिगलय् मेगु वालंनिसें स्कुल चायेकेगु निर्णय सरकारं याःगु दु ।