भ्यू टावर बारे मेगु निर्णय

येँ – थनया पुलांगु बसपार्कय् दयेकाच्वंगु भ्यू टावर बारे आः छु यायेगु धकाः निर्णय यायेत छगू कन्सल्टेन्सी हायर यानाः सल्लाह कायेगु तयारी येँ महानगरपालिकां यानाच्वंगु खँ येँमनपाया प्रवक्ता ईश्वरमान डंगोलं कनादीगु दु । ‘नेपालभाषा टाइम्स’ यात वय्कलं कनादी कथं ठेकेदार कम्पनीं यानाच्वंगु ज्या सन्तोषजनक मजूगु कारणं भ्यू टावरया निर्माण इलय् सिधइगु सम्भावना मदयाच्वंगु दु ।

वय्कलं धयादी, ‘ज्या यानाच्वंगु तसकं सुस्त दु । थ्व गतिं ज्या यात धाःसा क्वःछिनातःगु इलय् क्वचाइगु सम्भावना द हे मदु, अथे जुयाः आः गुलि ज्या जुयाच्वंगु दु । उकिया मूल्यांकन यायेत कन्सल्टेन्सी हायर यायेगु तयारी जुयाच्वंगु दु । वयां लिपा छु यायेगु धइगु निर्णय जुइ ।’

ठेकेदार कम्पनी लिसे जूगु सम्झौताया म्याद दनिगुलिं तत्काल ठेक्का त्वाःथलेगु सम्भावना नं मदुगु खँ वय्कलं कनादिल । आः हे छक्वलं
ठेक्का त्वाःथल धाःसा ठेकेदार कम्पनी अदालत वने फइगु सम्भावना दुगुलिं येँमनपां अध्ययन लिपा जक थुकिया बारे निर्णय यायेत्यंगु खः । थ्व निर्णय यायेगु लागिं हे कन्सल्टेन्सीयाके सल्लाह कायेगु ज्या मनपां यायेत्यंगु खः ।

पुलांगु बसपार्कय् भ्यु टावर दयेकेत ठेकेदार कम्पनीया मालिक मनोज भेटवालयात प्रहरीं हुण्डी कारोबार याःगु द्वपनय् वंगु छुं न्हिं न्ह्यः ज्वंगु खः । थ्व स्वयां न्ह्यः एपेक्स बैंक घोटाला यायेगु ज्याय् नं ल्हाः दुगु धासें वयात प्रहरी ज्वनेधुंकूगु दु । एपेक्स बैंक घोटाला प्रकरणय् भेटवालयात ज्वनेवं उगु इलय् नं बसपार्कया ज्या दिउगु खः । अन भ्यू टावर दयेके मजिउ धकाः न्हापा आन्दोलन जूगु खःसा आः आन्दोलन याःपिं नं मौन च्वनेधुंकूगु दु ।