भचा धैर्य यानादिसँ, याकनं फोहर व्यवस्थापन जुइ- प्रमुख शाक्य
येँ – येँ महानगर पालिकाया प्रमुख विद्यासुन्दर शाक्यं स्वनिगलय् छुं दिं न्ह्यवंनिसें मुनाच्वंगु फोहरया व्यवस्थापन याकनं जुइगु खँ धयादीगु दु । प्रमुख शाक्यं महानगरलिसें स्वनिगःया सतक, चुकलिसें थाय्थासय् मुनाच्वंगु फोहर याकनं हे व्यवस्थापन यायेगु खँ धयादीगु खः ।
आः नकतिनि जक स्वनिगःया फोहर अन्तिम व्यवस्थापन याना वयाच्वंगु नुवाकोट जिल्लाया ओखरपौवास्थित ल्याण्डफिल साइट व बञ्चरे डाँडास्थित निर्माणाधीन दीर्घकालीन ल्याण्डफिल साइटया स्थलगत रिपोर्टिङ यानाः लिहां वःपिं संचारकःमितलिसे खँल्हाबल्हा यासें महानगर प्रमुख शाक्यं उगु खँ धयादीगु खः ।
फोहर व्यवस्थापन याना वयाच्वंगु सिसडोलतक वनेगु लँ छुं दिं न्ह्यःनिसें मदिक्क वा वयाः स्यंगु व फोहर ज्वना वनीगु कन्टेनर यंकेत समस्या जूगुलिं फोहर व्यवस्थापन यायेगु ज्याय् समस्या वयाच्वंगु खः । महानगर प्रमुख शाक्यं आःया समस्यायात कयाः धयादिल, ‘सिसडोलतक वनेगु लँ वा वयाच्वंगुलिं स्यनाच्वंगु दु । छुं दिं न्ह्यः तक फोहर ज्वना वनीगु गाडी यंकेत समस्या जूगुलिं डोजरं घ्वानाः च्वय्तक यंकेगु यानाच्वंगु खःसा आः वयाः उकथं घ्वानाः यंकेत नं समस्या जुयाच्वंगु दु । थ्व हे कारणं पूर्ण क्षमतालिसें ज्या याये मफुगुलिं सतकय् फोहर मुनाच्वंगु खः ।’
‘छिकपिं सिसडोलया लिपांगु अवस्थायात कयाः स्थलगत रिपोर्टिङ यानाः लिहां झायादीगु द । जिपिं बञ्चरे डाँडा गबलय् हस्तान्तरण याइ धकाः पियाच्वना । फोहरया दीर्घकालीन व स्थायी रुपं व्यवस्थापन जुइगु थाय् नं वहे खः । अबलय् तकया निंतिं नियमित प्रक्रियापाखें फोहर व्यवस्थापन यायेगु ज्या जुइ ।’ वय्कलं संचारकःमितय्त धयादिल ।
सिसडोलतक स्यनाच्वंगु लँ दयेकेत छुं ई काइगु जूगुलिं हे छेँखापतिकं, व्यवसाय, ज्याकू, रेष्टुरेन्ट, होटल, कल कारखाना लगायतया थासं उत्पादन जुइगु फोहर पिने वांमछ्वसे ग्वाहालि यानादीत महनगरवासीयात महानर प्रमुख शाक्यं इनाप नं यानादिल ।
प्रमुख शाक्यं धयादिल, ‘जैविक फोहरयात साः दयेकेगु विधि नाले फत धाःसा छेँय् नवइ धइगु जुइमखु । मछिंगु इलय् ध्वगिना वनीगु फोहर नं छेँया हे गुगुं छगू थासय् मुंका तयादिसँ । थ्व समस्या सकसिगुं मंकाःकुतलं समाधान याये फइ । सतकय् न्ह्यःने लाःथाय् फोहर वांछ्वयेगु ज्यां दृश्य प्रदूषण जक मखु, वातावरण नं दुर्गन्धित जुइ । थुकिं समस्या जुइगु झीत हे खः । लँ मर्मत यानाः फोहर व्यवस्थापनया निंतिं निरन्तर कुतः यानाच्वनागु दु, धैर्य यानादिसँ ।
फोहरया समस्या ज्यंकेत नेपाल सरकार, सहरी विकास मन्त्रालय, भौतिक पूर्वाधार मन्त्रालयलिसें बिस्कं बिस्कं व मंकाःकथं समन्वय यायेगु कुतः यानाच्वनागु व लँ मर्मतया निंतिं सडक विभागलिसे नं सहकार्य यानाच्वनागु वय्कलं धयादिल ।
संचारकःमिलिसें फोहर व्यवस्थापन याना वयाच्वंगु सिसडोल ल्याण्डफिल साइट झायादीम्ह महानगरया वातावरण व कृषि विभागया प्रमुख हरिकुमार श्रेष्ठं सामान्य अवस्थाय् न्हिं १५० गः गाडी ल्याण्डफिल साइटय् वनाच्वंगु थासय् आः वयाः मुश्किलं ५० गः गाडी जक वनाच्वंगुलिं समस्या जुयाच्वंगु धयादिल । ल्याण्डफिल साइट च्वय् दयेकूगु करिब ४०० मिटर सतकय् ट्रक यंके फयाच्वंगु अवस्था मदु ।
LEAVE YOUR COMMENTS