जैशीदेवल युथ क्लबया २६ दँ बुन्हि हन

येँ – थनया जैशीदेगलय् च्वंगु सामाजिक संस्था जैशीदेवल युथ क्लबं थःगु २६ क्वःगु बुदिंया लसताय् जैशीदेगलय् छगू विशेष ज्याझ्वः यात । क्लबया अध्यक्ष राजेश प्रजापतिया सभापतित्वय् न्ह्याःगु उगु ज्याझ्वलय मूपाहां कथं झाःम्ह येँ महानगरपालिकाया मेयर विद्यासुन्दर शाक्यं थौंकन्हयया युवातय्त समाजसेवापाखे अग्रसर जुइत बः बीमाःगु बिचाः तयादिल ।

देय्या विकास युवातय्गु अग्रसरता मदयेक सफल जुइ मखु तर थौंकन्हय्या युवात थःगु पढाइ व क्यारियरया लिउलिउ जुजुं समाजसेवापाखे यक्व न्ह्यज्याये मखनाच्वन, थ्व बिडम्बनायात चीकेत पुलांगु पुस्तां उमित प्रोत्साहन यानाः समाजसेवापाखे न्ह्यज्याकेमाःगु खँय् नं वयकलं बः बियादिल । लिसें वय्कलं स्थानीय जनता हे धाथेंया स्थानीय सरकार जुइगु जुयाः स्थानीय तवरं जुइमाःगु विकास निर्माणया ज्याय् सकलें सक्रिय जुइत नं सकसितं इनाप यानादिल ।

ज्याझ्वलय् क्लबया महासचिव चन्दगोपाल प्रधानं लसकुस यानादीगु खःसा क्लबया नायः राजेश प्रजापतिं
वयेत्यंगु यँयाः जात्राया ज्याझ्वलय् क्वःनेयाःबलय् क्लबं याइगु थीथी ज्याझ्वःया जानकारी बियादीगु खः ।
ज्याझ्वलय् येँमपा २१ वडाया वडा अध्यक्ष उदयचुडामणि वज्राचार्य व क्लबया सल्लाहकार मधुसुदन प्रधानपिंसं क्लबया बारे थःपिनिगु नुगःखँ प्वंकादीगु खः ।