इजरायलं परमाणु वैज्ञानिकया हत्या याःगु द्वपं

येँ (बीबीसी)- इरानया राष्ट्रपतिं इजरायलं थःगु देय्या वरिष्ठतम परमाणु वैज्ञानिकया हत्या याःगु द्वपं बिउगु दु । इरानया राष्ट्रपति हसन रुहानी उगु द्वपं बिउगु खः । लिसे राष्ट्रपतिं वैज्ञानिकया हत्याया बदला गुगुं नं इलय् कायेगु ख्याच्वः नं बिउगु दु।

इरानया परमाणु वैज्ञानिक मोहसिन फख्रिजजादेहया हत्यां वंगु शुक्रवाः जूगु खः । तर इजरायलं धाःसां इरानी राष्ट्रपतिया द्वपंयात कयाः गुगुं नं कथंया प्रतिक्रिया बिउगु मदुनि । तर ताः ई न्ह्यवंनिसें इरानया परमाणविक ज्याझ्वः न्ह्याकेगु निंतिं ज्या यानाच्वंम्ह फख्रिजादेह प्रमुख खः धइगु द्वपं बिया वयाच्वंगु खः ।

सन् २०१० निसें २०१२ तकया दुने इरानया प्यम्ह परमाणु वैज्ञानिकया हत्या जुइधुंकूगु दुसा वैज्ञानिकया हत्याय् इजरायलया संलग्नता दुगु द्वपं इरानं बियाच्वंगु दु । इरानं परमाणु वैज्ञानिकया हत्या जूसां नं थःगु परमाणु उत्पादन यायेगु ज्यायात धाःसा निरन्तरता बीगु खँ धाःगु दुसा इरानं हाकनं परमाणु हतियार दयेकेगु ज्याझ्वःयात न्ह्याकल धाःसा अमेरिका व अमेरिकाया साझेदार देय्लिसे तनाव अप्वये फइगु आशंका प्वंकूगु दु ।

इरानं थःगु परमाणविक ज्याझ्वः नितान्त रुपं शान्तिपूर्ण उद्देश्यया निंतिं जूगु खँ धायेगु यानाच्वंगु दुसा इरानं युरेनियम उत्पादन अप्वयेकेवं उकियात कयाः थीथी आशंका नं ब्वलनाच्वंगु दु । युरेनियम गैरसैनिक उत्पादन सैनिक अस्त्र दयेकेगु निगुलिं ज्या महत्वपूर्ण भूमिका दु । सन् २०१५ सं खुगू शक्ति राष्ट्रलिसे जूगु सम्झौताय् इरानय् युरेनियम उत्पादनयात म्हो याना बिउगु खः । तर सन् २०१८ सं अमेरिकी राष्ट्रपति डोनाल्ड ट्रम्पं थःगु देय्यात उगु सम्झौतापाखें बिस्कं जूगु घोषणा यायेवं इरानं सहमतियात माने मयाःगु खः ।

खुगू देय् व इरान दथुइ जूगु सम्झौतायात इजरायलं विरोध याना वयाच्वंगु खः । तर अमेरिकी राष्ट्रपति निर्वाचित जूम्ह जो वाइडेनं धाःसा इरान लिसे जूगु सम्झौताय् थः हाकनं लिहां वयेगु प्रतिवद्धता दु । फाख्रिजादेह परमाणु वैज्ञानिक निसे इरानया ‘इस्लामिक रिभोल्युशनरी गार्ड कर्प्स’ या वरिष्ठ अधिकारी खः । सन् २०१८ सं इजरायलं लुइकूगु छगू गोप्य दस्तावेजया कथं परमाणु अस्त्र दयेकेगु निंतिं फाख्रिजादेहं मू भूमिका म्हितूगु खः ।